Афғонистонда «Толибон» раҳбарияти аёллар учун гўзаллик салонларини ёпишга қарор қилгани ҳақида ОАВда тарқалган хабарлар ҳақиқатга тўғри келмайди. Бу ҳақда «Толибон»нинг Доҳадаги сиёсий идораси раҳбари Муҳаммад Суҳайл Шохин журналистларга маълум қилди.
«Бу ҳақиқатдан йироқ, тегишли ҳукумат бу даъвони рад этади», — деди у.
10 январь куни эрталаб Al-Arabia телеканали манбаларга таяниб, «Толибон» раҳбарияти Афғонистонда аёллар учун гўзаллик салонларини ёпишга буйруқ бергани ҳақида хабар берганди. Манбаларга кўра, «Толибон» томонидан тузилган Афғонистон муваққат ҳукумати ўн кунлик муддат белгилаган, шундан сўнг гўзаллик салонлари ёпилиши керак. Бундан ташқари, толиблар қизларнинг савдо марказларида ишлашини тақиқлагани айтилмоқда.
2021 йилда ҳокимиятга келганидан бери «Толибон», уларнинг наздида исломий қадриятларга хос чекловларни жорий қилмоқда. Хусусан, улар аёл телебошловчиларга ҳижоб ўрашни мажбурий қилди, аёл актрисалар иштирокидаги драматик фильмлар ва кўрсатувлар намойишини тақиқлади.
Афғонистонда аёлларнинг истироҳат боғларига бориши ҳам тақиқланган. Аёл ва қизларнинг ишлаши ҳамда таълим олиши ҳам «Толибон» томонидан чекланган.
Изоҳ (0)