Канада Бирлашган Миллатлар Ташкилотининг фаластинлик қочқинлар бўйича агентлигини (UNRWA) молиялаштиришни қайта тиклайди. Мазкур молиялаштириш аввалроқ агентлик ходимлари ва Фаластиннинг ҲАМАС ҳаракати ўртасидаги алоқалар ҳақидаги шубҳалар туфайли тўхтатилган эди. Бу ҳақда Канада халқаро тараққиёт вазири Аҳмад Ҳуссен баёнотига таяниб, “РИА Новости” хабар берди.
Вазирнинг таъкидлашича, Оттава БМТнинг расмий текшируви ҳали якунланмаганига қарамай, UNRWA масъулият, назорат ва ошкораликни кучайтириш бўйича чоралар кўрган, деб ҳисоблайди.
Канада БМТнинг бошқа донорлари ва UNRWA билан ҳамкорликда давом этаётган тергов ва ташкилот фаолиятининг мустақил таҳлили натижасида келиб чиқадиган тавсияларнинг тўлиқ бажарилишини таъминлашга интилади, — деди Ҳуссен.
Аввалроқ Канада бош вазири Жастин Трюдо UNRWA’ни молиялаштиришни қайта тиклаш имкониятини изоҳлар экан, ҳукумати БМТ терговининг боришини диққат билан кузатаётганини айтган эди. 7 октябрь куни Исроилга қилинган ҳужумга UNRWA агентлиги ходимларининг алоқадорлиги ҳақида хабар тарқалган эди. Ушбу жангчилар сони ва уларнинг ҳужумга алоқадорлик даражаси ҳақида хабар берилмаган.
Ташкилот раҳбари Филиппо Лаззаринининг айтишича, Исроилга ҳужумда гумон қилинган агентлик ходимлари айби исботланган тақдирда судга тортилади. Бироқ Финляндия, Буюк Британия, Италия, Австралия, Германия, Швеция, Япония ва бошқа қатор давлатлар ташкилотни молиялаштиришни тўхтатганини аллақачон эълон қилган.
Изоҳ (0)