Болгарияда ташландиқ юк машинасидан 18 нафар афғонистонлик қочқиннинг жасади топилди. “Толибон” Болгария ҳукуматига мурожаат қилди (фото)

Болгария пойтахти София яқинида ташлаб кетилган юк машинаси ичидан 18 нафар афғон муҳожирининг жонсиз жасади аниқланди. Бу ҳақда Reuters хабар берди.

Маълум қилинишича, юк машинаси ичида 52 нафар афғонистонлик ноқонуний муҳожир бўлган, улардан 18 нафари, жумладан бир бола ҳалок бўлган. 34 нафар қочқин касалхонага ётқизилган. Ҳозирда 19 киши шифокорлар назоратида қолмоқда, қолганлари қочқинларни жойлаштириш марказларига юборилган.

“Текширув бошланганидан буён ўтган 24 соат давомида ноқонуний миграцияни ташкил этган жиноий гуруҳнинг фаолияти фош этилди. У олти кишидан иборат бўлиб, мустақил равишда юк машиналарида мигрантларни ташиш, уларни ҳар ойда икки марта ташиш учун яшириниш жойлари ташкил қилган. Бу сафар автомобиль кузовига одатдагидек 30 эмас, балки 50 дан ортиқ одам ортилган.

Ҳаракат бошланганидан бир соат ўтгач, юк машинаси ҳайдовчилари кузовдаги шовқинни эшитиб, нима бўлаётганини текшириш учун тўхтаган ва муҳожирларнинг бир қисми ҳалок бўлганини аниқлаган. Улар юк машинасини ташлаб, воқеа жойидан қочиб кетган”, — деди Миллий тергов хизмати директори Борислав Сарафов.

Унинг сўзларига кўра, 52 нафар мигрант ҳаво етишмайдиган қаттиқ яширин жойда бўлган ва улардан 18 нафари бир соат ичида вафот этган. Текширув натижасида муҳожирларнинг ҳар бири Европага бориш учун 5000 евродан 7000 еврогача пул тўлагани аниқланган.

Афғонистонни назорат қилаётган “Толибон” ҳаракатининг Ташқи ишлар вазирлиги ҳолат юзасидан муносабат билдирган. Улар Болгария ҳукуматини Афғонистондан келган муҳожирларнинг ўлимида айбдорларни жазолашга чақирган.

“Биз барча халқаро ташкилотлар ва Болгариядан одам савдогарларини қўлга олиб, қонун қўлига топширишини истаймиз”, — дейилади “Толибон” мурожаатида.