Afg‘onistonda “Tolibon”ning hokimiyat tepasiga kelishi va undan keyingi qashshoqlik millionlab odamlarni Eronga qochishga majbur qilgandi. Endilikda Eron noqonuniy muhojirlarini ommaviy deportatsiya qilmoqchi.
![](/static/2024/09/12/photo_2024-09-12_20-55-36-Wo13t9--.jpg)
“Mamlakatda noqonuniy qochqinlarning mavjudligi nafaqat ijtimoiy zarar keltiradi, balki mahalliy aholining ish joylarini ham tortib oladi”, dedi Eron ichki ishlar vaziri Iskandar Momeyni.
Afg‘onistonliklarning qo‘shni Eronga ko‘chishi 2021-yil avgust oyida boshlangan. BMTning Qochqinlar agentligi hisob-kitobiga ko‘ra, Eronda 4,5 millionga yaqin afg‘on muhojirlari mavjud. Eron OAVga ko‘ra, mamlakatda jami 8 million afg‘on bo‘lib, ulardan 4 millioni noqonuniy muhojirlardir.
Eron va “Tolibon” hukumati bilan diplomatik aloqalarga ega, deportatsiya tartib-qoidalari bo‘yicha ikki tomonlama kelishuvlar mavjud. Maʼlum qilinishicha, 2024-yilning dastlabki olti oyida 400 ming Afg‘oniston fuqarosi Erondan mamlakatga qaytarilgan. Biroq tahlilchilar deportatsiya qilingan afg‘onlarning bir qismi yana Eronga qaytishini bashorat qilmoqda.
Oddiy eronliklarning afg‘on muhojirlarga munosabatini hech kim tahlil qilmagan. Biroq Eron muxolifati rasmiy Tehron vaziyatdan muhojirlarga nisbatan nafrat uyg‘otishda foydalanmoqda, degan xulosaga kelgan. Milliy qarshilik kengashiga ko‘ra, Eron rasmiylari o‘z vatandoshlariga ataylab noto‘g‘ri ma’lumot bermoqda. Xususan, davlat OAV qochqinlar tomonidan olib kelingan moxov kabi turli xil infeksiyalarning avj olgani haqida bir necha bor xabar bergan.
“Ayni paytda Tehron qochqinlar muammosidan BMT inspektorlariga ijtimoiy siyosatdagi noto‘g‘ri hisob-kitoblari uchun bahona sifatida foydalanmoqda”, deb yozadi muxolifat kengashi.
Qarshilik harakatiga ko‘ra, barcha muammolar migratsiya masalalarida muvofiqlashtirish va boshqaruvning yetishmasligidan kelib chiqmoqda.
Izoh (0)