Афғонистон Вазирлар Маҳкамаси раиси Муҳаммад Ҳасан Охунд Туркманистон—Афғонистон—Покистон—Ҳиндистон (ТAPI) газ қувури лойиҳасини амалга ошириш бўйича ишлар яқин орада тикланиши ҳақида маълум қилди. Бу ҳақда “Репорт.аz” хабар берди.
Маълум бўлишича, Афғонистон бош вазири Туркманистон президенти Сердар Бердимуҳамедовга ҳайит муносабати билан йўллаган табрик телеграммасида мазкур мавзуга урғу берган.
Шунингдек, мактубда Афғонистон Туркманистон билан сиёсий ва иқтисодий муносабатлардаги сўнгги ютуқларни юксак қадрлаши ва ҳамкорликни янада ривожлантиришни интиқлик билан кутиши таъкидланган.
Фурсатдан фойдаланиб, Туркманистон—Афғонистон—Покистон—Ҳиндистон газ қувури лойиҳаси бўйича ишлар тез орада тикланиши кутилаётганини таъкидламоқчиман, — дейилади мактубда.
Йилига 33 миллиард куб метр табиий газ ўтказиш қувватига эга, узунлиги 1,8 минг километрдан ортиқ бўлган ТAPI газ қувурининг қурилиши 2015 йилда бошланган. Айни пайтда “Туркмангаз” давлат концерни газ қувурининг Туркманистон ҳудудидан ўтувчи 214 километрлик участкасини қуриш ишларини якунлаб, фойдаланишга тўлиқ тайёрлаб қўйган.
Туркманистон матбуотининг хабар беришича, айни пайтда Ҳирот вилоятидаги саноат корхоналари ва хусусий уй хўжаликларини табиий газ билан таъминлашга мўлжалланган ТAPI газ қувурининг Афғонистон ҳудудидаги 150 километрлик участкасини қуриш бўйича ишлар олиб борилмоқда.
Изоҳ (0)