Toshkent viloyatida o‘qituvchi 9-sinf o‘quvchisini haqorat qilib, do‘pposladi
Ijtimoiy tarmoqlarda Oqqo‘rg‘on tumanida maktab o‘quvchisi informatika o‘qituvchisi tomonidan ayovsiz kaltaklangan videolavhalar tarqaldi. Holat yuzasidan Bolalar ombudsmani maʼlumot berdi.
Foto: Ijtimoiy tarmoqlar
Aniqlanishicha, hodisa 9-oktyabr kuni Oqqo‘rg‘on tumanida joylashgan 6-umumtaʼlim maktabida sodir bo‘lgan.
Informatika fani o‘qituvchisi M.A (1990-yilda tug‘ilgan erkak) mazkur fandan qo‘shimcha dars o‘tayotgan vaqtida 9-sinf o‘quvchisi voyaga yetmagan Q.S.ni (2009-yilda tug‘ilgan o‘g‘il bola) dars jarayonida o‘qituvchini go‘yoki chalg‘itganligi tufayli haqorat qilib, do‘pposladi.
Hozirda ushbu holat yuzasidan Oqqo‘rg‘on tuman IIB tomonidan tergovga qadar tekshiruv harakatlari olib borilmoqda.
Voyaga yetmagan Q.S.ga nisbatan jarohat darajasini aniqlash bo‘yicha sudga oid tibbiy ekspertiza tayinlangan.
O‘quvchilar o‘rtasida mushtlashuvlar
2022-yilning oktabrida ijtimoiy tarmoqlarda Namanganning Kosonsoy tumanida maktab o‘quvchilari mushtlashuvi aks etgan tasvirlar tarqalgandi. Noyabrda esa Toshkentda o‘quvchilar futboldagi janjal sabab mushtlashib ketgan edi. Keyinroq poytaxt IIBB voqeaga munosabat bildirib, mazkur holat yuzasidan Yangihayot tumani IIO FMB tomonidan tekshiruv o‘tkazilayotganini ma’lum qilgan.
Shuningdek, Toshkentda maktab o‘quvchilari “Amerika kinosiga taqlid qilib” mushtlashuv uyushtirgani, Xorazm viloyati Urganch tumanida joylashgan ikki maktab o‘quvchisi o‘rtasida janjal sodir bo‘lgani to‘g‘risida xabar berilgandi.
2023-yilning iyun oyida Toshkent shahar Yunusobod tumanida joylashgan maktablarning birida o‘quvchi yigit bir necha tengdoshlari tomonidan kaltaklangandi.
Izoh (0)