Andijon viloyatining Paxtaobod tumanidagi 13-umumta’lim maktabining rus tili fani o‘qituvchisi ushbu muassasaning 10-sinf o‘quvchisi Asadbek Rustamovni kaltaklagani haqida xabar tarqaldi. Voqea tafsilotini o‘rgangan “Daryo” muxbiri bilan suhbatlashganlarning aytishicha, bunga o‘quvchining o‘qituvchiga nojoiz so‘z aytgani sabab bo‘lgan.
Asadbek Rustamovning aytishicha, o‘qituvchi uni maktab binosining yo‘lagida turgani uchun ichkariga kirishini so‘ragan. Asadbek nojo‘ya so‘z aytgani uchun shapaloq tortgan. Keyin do‘pposlagan.
“O‘sha kuni birinchi va ikkinchi soatdagi darslar tugagach, tanaffusga chiqqandik. Meni urgan domla 11-sinf o‘quvchilarining rahbari edi. Xonamiz 11-sinf bilan birin-ketin joylashgan. Xonadan chiqib sinfdoshlarimni chaqirish uchun ‘koridor’da turgandim. Shu payt domla ikki o‘quvchisi bilan birga chiqib qoldi va mendan uning o‘quvchilarida ishim bor yoki yo‘qligini so‘radi. Yo‘q, deganimdan so‘ng unda xonangga yo‘qol, nima qilib turibsan, dedi. Hozir tanaffus payti ekanligini aytsam ham xonamga kirishimni aytib baqirdi. Kirayotib o‘zim ma’nosini tushunmaydigan yomon so‘z bilan so‘kib yuboribman. Shu payt domla yana chaqirganini eshitib, orqamga qarashim bilan yuzimga bir shapaloq urdi. Jahlim chiqib, nega meni uryapsiz, bunga sizning haqqingiz yo‘q. Yuring, ‘zamdirektor’ning oldiga chiqamiz”, — dedim.
O‘qituvchi esa sen yana menga gap qaytaryapsanmi, deb ko‘zimga musht tushirdi. Ro‘za tutgan edim, ko‘z oldim qorong‘ilashib ketdi. Lekin hushimda edim. Burnim ham qonadi. Bo‘ldi, domla urmang, ‘zamdirektor’ning oldiga chiqaylik, dedim. Oldinga qarab yurib ketayotganimda meni orqaga sudradi. Keyin xoliroq joyga olib kirib, yana urdi. Qolganini eslolmayman. Uch kundan buyon qon to‘xtamayapti. Shifokorlarning aytishicha, ichki qon tomir yorilib ketgan ekan”,— deydi Asadbek Rustamov.
Asadbekning aytishicha, maktab direktori uni o‘qituvchilar bilan birga tuman markaziy poliklinikasiga olib borgan. Yo‘lda ketayotganida unga shifokorlarga “tosh tegdi yoki yiqilib tushdim” deyishini kerakligini aytib, bo‘lgan holatni aytmaslikni so‘ragan.
“Bu domla bizga bir yildan buyon darsga kiradi. Avval hecham sen-menga bormaganmiz. Muomalamiz yaxshi edi. O‘sha kungi birgina so‘zni deb shu ishlar bo‘ldi. Meni domlaga qo‘l ko‘tarmaganman. Domlaning urayotganini ko‘rgan 11-sinf o‘quvchilari ham ajratmagan. Indamay darsiga kirib ketdi. Men bazo‘r ‘zamdirektor’ning xonasiga kirib oldim. O‘sha paytda ‘zamdirektor’ ham qo‘rqib ketib, direktorni chaqirdi. Avval menga birinchi tibbiy yordam ko‘rsatishlarini so‘radim. Hamshira ham ko‘zimga nam ro‘molcha bosdi xolos. Hattoki birinchi yordam ko‘rsatishga ham hech narsasi yo‘q ekan. Shunda o‘qituvchi sog‘mi, nosog‘lommi? Nega o‘quvchini o‘zidan o‘zi urib ketaveradi? Nega bunchalik asabiy, tibbiy daftarchasini beringlar, dedim. Direktorimiz ham yigitchilikda shunaqa bo‘lib turishini, hovliqmasligimni, o‘zlari gaplashib olishlarini aytdi.
Direktorimiz meni poliklinikaga olib borib, o‘zining tanishlari orqali tekshirtirib, yaxshi ekan, degan javobni oldi. O‘sha yerda meni bir vrach ko‘rib qolib, tekshirgan boshqa shifokorlardan jahli chiqib, hammang qamalib ketasan, dedi. O‘zi esa ko‘zimni tekshirib ko‘rib, ichiga qon to‘lib qolganini ko‘rdi va zudlik bilan shoshilinch bo‘limiga olib chiqishlarini aytdi. Direktorimiz esa yo‘l bo‘yi menga shifokorlarga tosh tegdi yoki yiqilib tushdim, deyishim kerakligini uqtirib keldi. Mana anchadan buyon shifoxonadaman”, — deydi Asadbek Rustamov.
O‘quvchining onasi Ra’noxon Ahmedovaning ta’kidlashicha, farzandi o‘qituvchi boshqa o‘quvchilar oldida urgani uchun ruhan tushkunlikka tushib qolgan. Shu sababli endi yashagisi kelmayotganini aytib qo‘rqitmoqda.
“O‘sha kuni soat 12 larda telefonim jiringladi. Ko‘tarsam, 13-maktab direktorining ma’naviy va ma’rifiy ishlar bo‘yicha o‘rinbosari Dilafro‘z ustoz ekan. Avval xotirjamlik bilan hol-ahvolimni, so‘ng turmush o‘rtog‘im uyda yoki uyda emasligini so‘radi. Tinchlikmi, nima bo‘ldi, deb xavotirlana boshladim. Butun xayolim o‘g‘limga ketdi. Ro‘za og‘iz edi, biror kor-hol bo‘lmadimikin deb o‘yladim. Shunda u ayol turmush o‘rtog‘ingiz shoshilinchga kelib keta oladimi, dedi. O‘zimni qo‘yarga joy topolmay qoldim. Qayta-qayta nima bo‘lganini so‘rayverdim. O‘rinbosar o‘g‘lingiz yaxshi, mana ovozini eshiting, deb telefonni o‘g‘limga berdi. O‘g‘lim yaxshi ekanligini, xavotirlanmay kelaverishimni aytgach, erim bilan birga shifoxonaga bordik.
Borsam, o‘g‘lim bir ahvolda. Yig‘ladim, yupandim, yana yig‘ladim. Chunki bolamni ertalab sog‘lom holatda maktabga jo‘natgandim. O‘qituvchisi ‘koridor’da turgani uchun shu darajada urib mana shu holga keltirgan. Bolani o‘zicha urish, ‘samosud’ qilish noto‘g‘ri edi. Agar aybi bo‘lsa, sinf rahbarini yoki direktor o‘rinbosarini, u ham bo‘lmasa, direktorning oldiga olib kirsa bo‘lardi. Bolamni ikkita 11-sinf o‘quvchisi oldida urgan, shundanmi u ruhan tushkunlikka tushib qolgan. Meni qo‘rqitadigan gaplar aytyapti. Bekordan bekor oshnalarimni oldida urdi, endi yashagim kelmay qolyapti, deydi. Endi nima qilishni ham bilmayapman. Axir u o‘smir bo‘lsa. Hozir hatto bir o‘zini yolg‘iz qoldirishga ham qo‘rqib qoldim. Ichki ishlarga shifoxonadagi do‘xtirlar xabar berishibdi. Turmush o‘rtog‘imga ariza yozib berishi kerakligini aytishibdi, ular yozib berdi. O‘g‘limni urgan domla bilan ham gaplashdim. Turmush o‘rtog‘imdan uzr so‘rabdi, lekin farzandingiz gap qaytargandan keyin uraman-da, degandek gapiribdi”,— deydi Ra’noxon Ahmedova.
O‘quvchining otasi Muhammadjon Ergashev tuman xalq ta’limi bo‘limiga murojaat qilgan. Ular o‘qituvchiga hayfsan berish bilan kifoyalanishini aytgan xolos. O‘qituvchi esa o‘quvchini urishga haqqi borligini aytgan.
“Hozir tuman xalq ta’limi bo‘limiga borgan edim. Qonuniy chora ko‘radigan bo‘lsak, uning oyligidan 20-30 foiz ushlab qolishimiz mumkin. Bizning qo‘limizdan keladigani shu, deyishdi. Shundan keyin ichki ishlarga bu holat bo‘yicha qonuniy chora ko‘rishlarini so‘rab ariza yozib berdim. O‘g‘limni urgan domla bilan gaplashganimda, urishga mening haqqim bor, deb turibdi. Aslida umuman haqqi yo‘q-ku”, — deydi Muhammadjon Ergashev.
“Daryo” muxbiri o‘quvchini urgan o‘qituvchi, maktab direktori va o‘rinbosari bilan holat bo‘yicha gaplashishga uringan. Ammo direktor o‘quvchining otasi bilan xalq ta’limi bo‘limiga ketgan, o‘qituvchi esa yosh kadr ekanligini, butun respublikada gap so‘z bo‘lishini istamasligini aytib, savollarga javob berishdan bosh tortgan.
Viloyat xalq ta’limi boshqarmasi axborot xizmatining ma’lum qilishicha, holat tuman xalq ta’limi bo‘limi tomonidan maktabning pedagogik jamoasi ishtirokida o‘rganib chiqilgan. O‘rganish yakunlari bo‘yicha o‘qituvchiga nisbatan Mehnat kodeksining 181-moddasi 2-qismi (o‘rtacha oylik ish haqining o‘ttiz foizidan ortiq bo‘lmagan miqdorda jarima) bilan oylik ish haqining 30 foizi miqdorida jarima jazosi qo‘llanilgan. Bundan tashqari, maktabning ichki tartib qoidalariga rioya etishi bo‘yicha qat’iy ogohlantirilgan.
Izoh (0)