Farg‘onada o‘qituvchi kaltaklangani, holat yuzasidan jinoyat ishi qo‘zg‘atilgani haqida xabar berilgan edi. Milliy gvardiya o‘qituvchi kaltaklanishiga olib kelgan voqea tafsilotlarini e’lon qildi.
Unda keltirilishicha, 1-aprel kuni Farg‘ona viloyati Toshloq tuman markazida joylashgan 25-sonli maktabning 9-sinf o‘quvchisi X.S. soat 11:00 larda, ya’ni katta tanaffus vaqtida ushbu maktabning 7-sinf o‘quvchisi M.D.ning yuziga sport to‘pini uloqtirgan. Tarix fani o‘qituvchisi O.M. 9-sinf o‘quvchisini chaqirib, qo‘li bilan uni turtgan holda nojo‘ya xatti-harakati uchun tanbeh bergan.
O‘quvchi X.S. o‘qituvchiga ham hurmatsizlik qilgan holda bildirilgan tanbehdan noroziligini bildirib, onasiga qo‘ng‘iroq qilib o‘qituvchisi uni urib haqorat qilganini aytgan.
O‘qituvchi esa holat yuzasidan maktab direktoriga ma’lumot bergan. Oradan ko‘p vaqt o‘tmay o‘quvchining qarindoshlari — 2000-yilda tug‘ilgan X.A. va 2004-yilda tug‘ilgan X.J. yetib kelib, maktab qorovulidan direktor oldiga kelishganini aytib, kirish uchun ruxsat so‘ragan. Maktab qorovuli tomonidan direktorga xabar berilib, uning ruxsati bilan fuqarolar ichkariga kiritilgan. Vaziyatga aniqlik kiritish maqsadida maktab direktori, o‘qituvchi O.M. va o‘quvchi X.S. hamda uning qarindoshlarini o‘z xonasiga taklif qilgan.
Suhbat jarayonida o‘qituvchi va o‘quvchining qarindoshlari o‘rtasida o‘zaro kelishmovchilik yuzaga kelib, janjallashib ketishgani oqibatida o‘qituvchi O.M. yuz sohasiga qo‘l bilan urilgan zarbadan tan jarohati olgan.
Holatdan xabar topib yetib kelgan maktab-inspektor psixologi tashvish tugmasi orqali qo‘riqlash xodimlarini chaqirgan va zudlik bilan yetib kelgan tuman qo‘riqlash bo‘limi “tezkor harakatlanuvchi guruh” xodimlari tomonidan barcha holat ishtirokchilari hududiy IIBga olib borilgan.
Qayd etilishicha, hozirda holat yuzasidan Toshloq tuman IIB xodimlari tomonidan tergovga qadar tekshiruv xarakatlari olib borilmoqda. Ayrim holatlar yuzasidan qo‘shimcha tekshiruvlar talab qilingani sababli, tergovga qadar tekshiruv muddati tuman prokuraturasi tomonidan bir oyga uzaytirilgan.
Izoh (0)