Toshkent shahridagi maktablarning birida o‘qituvchi ayol o‘quvchi qizning onasi tomonidan kaltaklangani haqida xabar berilgan edi. Bosh prokuratura mazkur holat yuzasidan maʼlumot berdi.
Janjal sodir bo‘lgan Chilonzor tumanidagi maktabning direktor o‘rinbosari mojaro qizlar orasidagi “mayda-chuyda kelishmovchilik” sabab yuzaga kelganini aytgan. Qizlardan birining onasi emotsiyaga berilib, sinf xonasiga kirib, o‘qituvchini urib ketgan.
Aniqlanishicha, qizning onasi o‘qituvchini “hammaning oldida bolamga gapirishga nima haqqing bor?”, deya urgan. Shifokorlar bergan maʼlumotlarga ko‘ra, hozirda o‘qituvchining qon bosimi yuqori bo‘lgani sababli uni to‘liq tekshiruvdan o‘tkazishning imkoni yo‘q.
O‘qituvchiga qo‘l ko‘targan ayolning aytishicha, pedagog unga “yolg‘onchilar oilasi bo‘lganidan keyin yolg‘onchilar oilasi deyman-da, qo‘lingdan kelganini qil” degan va shundan keyin ayol uni urgan. Bu vaqtda o‘qituvchining o‘g‘li yetib kelib, ayolni ham ura boshlagan.
Bosh prokuratura axborot xizmatining maʼlum qilishicha, holat yuzasidan maktab o‘qituvchisiga tan jarohati yetkazgan ayolga nisbatan Jinoyat kodeksining 109-moddasi (qasddan badanga yengil shikast yetkazish) bilan jinoyat ishi qo‘zg‘atildi.
Toshkent shahar IIBB axborot xizmati rahbarining maʼlum qilishicha, holat yuzasidan Chilonzor tumani IIO FMB tomonidan tergovga qadar tekshiruv o‘tkazilmoqda.
O‘qituvchilarning kaltaklanish holatlari
Surxondaryo viloyati Sariosiyo tumanida maktab direktori bir necha shaxslar tomonidan kaltaklangani aytilgan edi. Shuningdek, viloyatning Sariosiyo tumani xalq ta’lim bo‘limi mudiri hududdagi maktablardan birining direktorini haqorat qilgan edi. Bir necha kun oldin esa Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi.
Izoh (0)