Qashqadaryo viloyati Qarshi shahrida o‘quvchi qizlardan birining onasi maktabga kelib, janjal uyushtirdi. Bu haqda viloyat IIB axborot xizmati xabar berdi.
Ma’lum qilinishicha, 8-may kuni taxminan soat 16:30 larda Qarshi shahar 1-sonli maktabning 6-sinf o‘quvchisi voyaga yetmagan qiz A.Sh. va shu maktabning 8-sinf o‘quvchisi voyaga yetmagan qiz T.F. o‘rtasida kelishmovchilik sodir bo‘lgan.
Oqibatda voyaga yetmagan A.Sh.ning onasi X.Sh. bir nechta tanishi bilan maktabga borib, voyaga yetmagan T.F. va boshqa voyaga yetmagan qizlarni haqorat qilib, bir nechtasini urib, tan jarohati yetkazgan.
Viloyat Maktabgacha va maktab ta’limi boshqarmasining ma’lum qilishicha, qizining yuqori sinf o‘quvchisi tomonidan kaltaklanganini eshitgan ayol bir necha sherigi bilan maktabga bostirib kelgan. Maktab direktori o‘rinbosari qizlar yoniga borib, ularni tajovuz qilayotgan onadan ajratayotgan vaqtida u bilan birga kelgan ayollar ham janjalga qo‘shilgan.
Mazkur holat yuzasidan Qarshi shahar IIO FMB huzuridagi Tergov bo‘limi tomonidan Jinoyat kodeksining 277-moddasi (bezorilik) 1-qismi bilan jinoyat ishi qo‘zg‘atilib, tergov harakatlari olib borilmoqda.
O‘qituvchilarning kaltaklanish holatlari
Surxondaryo viloyati Sariosiyo tumanida maktab direktori bir necha shaxslar tomonidan kaltaklangani aytilgan edi. Shuningdek, viloyatning Sariosiyo tumani xalq ta’lim bo‘limi mudiri hududdagi maktablardan birining direktorini haqorat qilgan edi. Bir necha kun oldin esa Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi. 10-may kuni Toshkent shahridagi maktablarning birida o‘qituvchi ayol o‘quvchi qizning onasi tomonidan kaltaklangani yuzasidan jinoyat ishi qo‘zg‘atildi.
Izoh (0)