Andijon viloyatida Qo‘rg‘ontepa tuman tibbiyot birlashmasi boshlig‘i vazifasini bajaruvchisi va kadrlar bo‘limi boshlig‘i ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Qo‘rg‘ontepa tuman tibbiyot birlashmasining kadrlar bo‘limi boshlig‘i N.X. fuqaro X.M.ni ushbu birlashmaga ishga qabul qilish masalasini hal qilib berishi evaziga 500 dollar olgan vaqtida ushlangan.
So‘ngra uning ko‘rsatuviga asosan tezkor tadbir davom ettirilgan.
U tibbiyot birlashmasi boshlig‘i v.v.b Ya.A. fuqaro X.M.ni yuqumli kasalliklar bo‘limiga ishga qabul qilishi evaziga o‘z xizmat xonasida kadrlar bo‘limi boshlig‘idan 500 dollarni olgan vaqtida qo‘lga olindi.
Mazkur holatlar yuzasidan Jinoyat kodeksining 210-moddasi (pora olish) jinoyat ishi qo‘zg‘atilib, tergov harakatlari o‘tkazilmoqda.
Ishga joylab qo‘yish uchun olinayotgan poralar
May oyida “Toshkent metropoliteni” DUK “Harakat” xizmati xodimi fuqaroning ishonchiga kirib, uni 2 million so‘m evaziga ishga joylab qo‘yishga kelishgan va undan 1 million so‘m miqdorida pora olayotgan vaqtda qo‘lga tushgandi.
Toshkentning Sergeli tumanida maktabda yuqori lavozimga ishga o‘tkazish evaziga 200 dollar olgan o‘qituvchi ushlangandi.
Qoraqalpog‘istonda fuqaroni Qoraqalpoq davlat universitetiga ishga kiritish evaziga 1,8 ming dollar olgan shaxslar ushlangani aytilgandi.
Bundan tashqari, Qoraqalpog‘iston Respublikasi, Toshkent va Andijon viloyatlarida ishga hamda o‘qishga kiritib qo‘yish bilan bog‘liq firibgarlik holatlari fosh etilgandi. Jumladan, Nukusda tez tibbiy yordam ilmiy markaziga ishga kiritish evaziga 40 mln so‘m olgan shaxs ushlangan.
Izoh (0)