Samarqanddagi maktabda o‘qituvchi o‘quvchi bolani urib, sinfdan chiqarib yuborgani aks etgan video tarqalgandi. Samarqand viloyati xalq ta’limi boshqarmasi videoda sodir bo‘lgan voqeaga aniqlik kiritdi.
Ma’lum qilinishicha, voqea 16-dekabr kuni Samarqand shahridagi 21-umumta‘lim maktabida geografiya darsida sodir bo‘lgan. Holat yuzasidan 21-umumta’lim maktabining navbatdan tashqari pedagoglar kengashi o‘tkazilgan. Kengash bayonnomasiga ko‘ra, o‘qituvchi S.H. geografiya darsida koptok tepib o‘ynab o‘tirgan o‘quvchi D.E.ni darsga xalaqit bermasligi yuzasidan bir necha bor ogohlantirgan va sinf xonasidan chiqarib yuborgan.
Shundan so‘ng o‘quvchi sinfga derazadan kirib o‘qituvchini sensirab haqorat qilgan. Ushbu holatdan keyin o‘qituvchi o‘zini to‘xtata olmay, bolani kaltaklagan.
Holat yuzasidan o‘qituvchiga xalq ta’limi vazirining 2022-yil 28-iyunda qabul qilingan “Umumiy o‘rta ta‘lim muassasalarining ichki tartib va odob-axloq qoidalari”ni qo‘pol ravishda buzganligi uchun hayfsan intizomiy chorasi qo‘llangan.
Viloyat xalq ta’limi boshqarmasi ishchi guruhi o‘qituvchi va o‘quvchining onasi bilan alohida-alohida suhbatlashgan. Suhbat davomida o‘qituvchi bunday holat boshqa qaytarilmasligini, o‘z ishidan pushaymonligini bildirgan. O‘quvchining onasi esa bolasining sho‘xligini ta’kidlab, hech kimga da’vosi yo‘qligini ma’lum qilgan.
Mavzuga doir:
Izoh (0)