Milliarder Ilon Mask agar AQSH prezidenti Donald Trampning soliq imtiyozlari to‘g‘risidagi qonun loyihasi qabul qilinsa, yangi partiya tuzish bilan tahdid qildi.
Mask qonun loyihasini qo‘llab-quvvatlaydigan kongressmenlar 2026-yilda bo‘lib o‘tadigan praymerizda yutqazishini aytgan edi.
Agar bu ahmoqona xarajatlar to‘g‘risidagi qonun loyihasi qabul qilinsa, ertasi kuni Amerika partiyasi tuziladi. Mamlakatimizga demokratlar va respublikachilarning bir partiyali tizimiga muqobil variant kerak, toki xalq haqiqatan ham OVOZ bera olsin, deb yozgan Mask X ijtimoiy tarmog‘ida.
Trampning javobi
AQSH prezidenti bunga javoban Maskka uning elektromobillari uchun berilgan subsidiyalarni eslatib o‘tgan. Siyosatchi elektromobillarga qarshi ekanini va Mask buni saylovdan oldin uni qo‘llab-quvvatlaganida bilganini aytgan.
Elektromobillar yaxshi, ammo har kimni ularni sotib olishga majburlash to‘g‘ri emas. Ehtimol, Ilon boshqalarga qaraganda tarixda eng ko‘p subsidiya olgan shaxs bo‘lishi mumkin, ularsiz u o‘z biznesini yopib, uyiga — Janubiy Afrikaga qaytishga majbur bo‘lardi. Natijada raketalarni uchirish, sun’iy yo‘ldoshlar yoki elektromobillar ishlab chiqarish to‘xtatilib, mamlakatimiz katta mablag‘ni tejab qolardi. Ehtimol, biz DOGE’ga bu masalani sinchiklab o‘rganishni topshirishimiz kerakdir? KATTA PUL TEJALADI!!! deb yozgan Tramp Truth Social sahifasida.
CNN telekanaliga ko‘ra, Ilon Maskning bayonoti u may oyi oxirida AQSH prezidenti ma’muriyatidan ketganidan keyin bildirgan eng jiddiy siyosiy tahdiddir. Mask AQSHdagi Respublikachilar partiyasining eng yirik donori hisoblanadi. Biznesmen 2022-yilda respublikachilar foydasiga katta miqdorda ommaviy xayriyalar qilish orqali partiyani qo‘llab-quvvatlashni boshlagan.
Ilon Mask va Donald Tramp iyun oyi boshida yuqoridagi qonun loyihasi ustida ziddiyatga borgan edi. Milliarder bu tashabbusni “jirkanch” deb atagan hamda iqtisodiyot uchun salbiy oqibatlarga olib kelishini aytgan. AQSH prezidenti esa Ilon Mask qonun loyihasidan juda yaxshi xabardorligi, tadbirkor elektromobillar uchun imtiyozlar bekor qilinayotgani sabab norozi bo‘layotganini ta’kidlagan. Bunga javoban Mask AQSH prezidentini yolg‘onchilikda ayblagandi.
Keyinchalik milliarder prezident haqidagi bir nechta postlari uchun uzr so‘rab, “haddan oshib ketganini” tan olgan. Amerika yetakchisi, o‘z navbatida, Maskning uzrlarini “juda samimiy” deb atagandi.
Bahsli qonun loyihasi
Qonun loyihasi Donald Tramp 2017-yilda o‘zining birinchi prezidentlik davrida joriy qilgan soliq imtiyozlarini uzaytiradi. Jumladan, AQSH mudofaasi va chegaralarini qo‘riqlash xarajatlarni oshadi va ba’zi ijtimoiy dasturlarni moliyalashtirish qisqaradi. Tramp hujjatni “katta va ajoyib qonun” deb atagan.
Vakillar palatasi qonun loyihasini may oyida qabul qilgan. Senat iyun oyi oxirida bo‘lib o‘tgan protsessual ovoz berish jarayonida hujjatni qo‘llab-quvvatlagan Senatorlar yakuniy ovoz berishni 4-iyulga qadar o‘tkazmoqchi.
Izoh (0)