Milliarder Kennet S. Griffin AQSH Konstitutsiyasiga 13-tuzatishning Avraam Linkoln tomonidan imzolangan qo‘lyozma nusxasini Sotheby’s kimoshdi savdosida sotib oldi.
Ma’lum qilinishicha, qullikni bekor qiluvchi ushbu hujjat 12 million dollarga sotilgan, komissiya bilan birga bitimning umumiy summasi 13,7 million dollarni tashkil etgan. Bu shu turdagi hujjatlar uchun rekord narx bo‘ldi.
Qo‘lyozma Sotheby’s savdosining Fine Books And Manuscripts, Including Americana deb nomlangan birinchi qismida taqdim etilib, asosiy lotlardan biriga aylandi. Hozirgi kunda kolleksionerlar qo‘lida bunday nusxalardan atigi to‘rttasi mavjud.
Bundan tashqari, Kennet S. Griffin 1864-yilda Linkoln imzolagan qullarni ozod qilish to‘g‘risidagi Proklamatsiyani ham sotib oldi. Hujjat unga 4,4 million dollarga tushdi, dastlabki baholash 3 million dollardan 5 million dollargacha bo‘lgan edi.
Milliarder o‘z bayonotida bu hujjatlarni “oldinga qo‘yilgan eng muhim qadam bo‘lgani” va barcha odamlarning tengligi g‘oyasini tasdiqlangani uchun sotib olganini ta’kidladi.
Citadel xedj-fondi asoschisi Kennet S. Griffin san’at sohasidagi eng yirik kolleksioner va homiylardan biri sifatida tanilgan. U muntazam ravishda ARTnews Top 200 Collectors ro‘yxatiga kiritiladi va Jasper Jons, Villem de Kuning, Jekson Pollok, Pol Sezann asarlariga egalik qiladi. Homiy, shuningdek, Nyu Yorkdagi MoMAdan tortib Chikagodagi Zamonaviy san’at muzeyi va Floridadagi Norton muzeyigacha bo‘lgan yetakchi muzeylarga katta miqdorda mablag‘ ajratadi.
Bundan avval malika Diananing ko‘ylagi auksionda yarim million dollarga sotilgani xabar qilingandi. Shuningdek, Fransiya imperatori Napoleon I Bonapartning qilichi Parijda 4,7 million yevroga sotilgandi.
Izoh (0)