Ukrainani Yevropa Ittifoqi va NATOga qabul qilish mumkin emas, chunki bu G‘arb davlatlarining Rossiya bilan urushga kirishishiga olib keladi. Bu haqda Vengriya bosh vaziri Viktor Orban Facebook’dagi sahifasida bildirgan.
“Agar Yevropa Ittifoqi Ukrainani o‘z safiga qo‘shsa, bu uning uchun darhol ochiq urush boshlanishini, o‘t ochish to‘xtatilgandan so‘ng esa Yevropa va Rossiya o‘rtasida doimiy urush xavfi paydo bo‘lishini anglatadi”, deya yozdi Viktor Orban.
Uning aytishicha, Ukrainaning NATOga qabul qilinishi Rossiya bilan zudlik bilan urush boshlanishini va uchinchi jahon urushi xavfini keltirib chiqarishi mumkin.
“Shu sababli Ukraina NATO yoki Yevropa Ittifoqiga qabul qilinmasligi kerak. Vengriyaning asosiy xavfsizlik manfaatlari Ukraina bilan umumiy integratsiya tuzilmasining bir qismi bo‘lmaslikni taqozo etadi”, deb ta’kidladi Vengriya bosh vaziri.
Uning bunday bayonotiga nafaqat NATO va YI sammitlari, balki Budapeshtda bir qator vengriyalik siyosiy va jamoat arboblarining Ukrainani qo‘llab-quvvatlovchi deklaratsiyasi e’lon qilinishi ham sabab bo‘lgan. Ular tomonidan tayyorlangan hujjatda Rossiyaga nisbatan ayblovlar va Ukrainaga harbiy yordam ko‘rsatishdan bosh tortayotgan hamda ushbu mamlakatning shoshilinch ravishda YIga qabul qilinishiga qarshi chiqayotgan Vengriya hukumatini tanqid qilish o‘rin olgan.
Biroq Orbanning fikricha, “deklaratsiyani imzolaganlar Vengriya manfaatlarini e’tiborsiz qoldirmoqda”.
“Ular Rossiya-Ukraina urushi davom etishining aniq oqibatlarini yetarlicha baholamayapti va urush davom etar ekan, har kuni yangi foyda olishi mumkin bo‘lgan Rossiya manfaatlariga beixtiyor xizmat qilishmoqda. Shuningdek, ular Yevropa Ittifoqi manfaatlarini noto‘g‘ri talqin qilishmoqda”, deya ta’kidladi Orban.
Bosh vazirning ta’kidlanishicha, Vengriya hukumati Ukrainadagi mojaroning boshidanoq uni tinch yo‘l bilan hal qilish tarafdori bo‘lgan va Yevropa Ittifoqining boshqa mamlakatlaridan farqli o‘laroq, Ukraina armiyasini qurol-yarog‘ bilan ta’minlashdan bosh tortgan. Shu bilan birga, u Rossiyaning harakatlarini qoralagan va Ukraina suverenitetini qo‘llab-quvvatlashini tasdiqlagan. Vengriya hukumati qo‘shni davlatga iqtisodiy va gumanitar yordam, jumladan, qochqinlarga ko‘mak ko‘rsatmoqda.
Izoh (0)