Polshaning yangi saylangan prezidenti Karol Navrotskiy Ukrainaning Yevropa Ittifoqiga qo‘shilishiga qarshi chiqdi. Bu haqda Mandiner gazetasiga bergan intervyusida qayd etib o‘tdi.
Bryusselning Kiyevning Yevropa Ittifoqiga tezroq qo‘shilishi haqidagi chaqiriqlariga qanday munosabat bildirishi so‘ralganida Navrotskiy: “Hozirda men Ukrainaning Yevropa Ittifoqiga qo‘shilishiga qarshiman”, deb javob berdi.
U bir tomondan Yevropa davlatlari mojaroda Kiyevni qo‘llab-quvvatlayotganini, biroq “Ukraina Polsha va Vengriya kabi davlatlar hamda boshqa Yevropa davlatlarining ham o‘z manfaatlari borligini tushunishi kerak”ligini aytdi.
Shuningdek, u saylovoldi tashviqotida ham Polsha bozori Ukraina qishloq xo‘jaligi mahsulotlari bilan to‘lishi sababli polshalik ishlab chiqaruvchilar uchun nohaq raqobat yuzaga kelishiga qarshi chiqqanini taʼkidlab o‘tdi.
Navrotskiy Ukrainaning tarixiy muammolar hal qilinmaguncha NATOga a’zo bo‘lishiga ham qarshi chiqqan. Qo‘shni respublika “Volindagi polyaklar genotsidi” uchun javobgarlikni tan olishi kerak, deb hisoblaydi.
Ukrainaning Yevropa Ittifoqiga a’zo bo‘lishiga Vengriya ham qarshi chiqqandi. Bu “tuganmas urush”ga olib kelishi mumkin, degan edi bosh vazir Viktor Orban.
Konservator Karol Navrotskiy Polshadagi prezidentlik saylovining ikkinchi bosqichida 50,89 foiz ovoz bilan g‘alaba qozongandi. Navrotskiy Ukrainaga nisbatan qarama-qarshi munosabatda. Navrotskiyning pozitsiyasi Ukraina prezidenti Vladimir Zelenskiy tomonidan tanqid qilingandi. U agar Ukraina Yevropa Ittifoqi va NATOga a’zo bo‘lmasa, Polsha rahbari “qo‘lida qurol bilan o‘z mamlakatini Rossiyadan himoya qilishi” kerakligini aytgandi.
Izoh (0)