Polshadagi prezidentlik saylovining ikkinchi bosqichida barcha ovozlar hisoblab chiqilgach, konservator Karol Navrotskiy 50,89 foiz ovoz bilan g‘alaba qozondi. Bu haqda Gazeta Wyborcza xabar berdi.
Polshada 1-iyun kuni prezidentlik saylovlarining ikkinchi bosqichi bo‘lib o‘tdi. Unda bosh vazir Donald Tuskning Fuqarolik koalitsiyasi partiyasidan nomzod Rafal Shaskovskiy va “Huquq va adolat” partiyasi tomonidan qo‘llab-quvvatlangan Karol Navrotskiyga ovoz berildi.
Saylovning birinchi bosqichida Shaskovskiy 31,36 foiz bilan g‘alaba qozongandi, Navrotskiy esa undan 2 foizdan kamroq, 29,54 foiz bilan ortda qolgandi.
Navrotskiy Ukrainaga nisbatan qarama-qarshi munosabatda
U Ukrainaning tarixiy muammolar hal qilinmaguncha NATO va Yevropa Ittifoqiga a’zo bo‘lishiga qarshi chiqqan. Qo‘shni respublika “Volindagi polyaklar genotsidi” uchun javobgarlikni tan olishi kerak, deb hisoblaydi.
Navrotskiyning pozitsiyasi Ukraina prezidenti Vladimir Zelenskiy tomonidan tanqid qilingandi. U agar Ukraina Yevropa Ittifoqi va NATOga a’zo bo‘lmasa, Polshaning bo‘lajak rahbari “qo‘lida qurol bilan o‘z mamlakatini Rossiyadan himoya qilishi” kerakligini aytgandi.
Navrotskiyning fikricha, Polsha birinchi navbatda o‘z xavfsizligi va manfaatlari haqida qayg‘urishi kerak, Ukrainaga harbiy yordam esa Polsha armiyasini zaiflashtirmasligi lozim. Ikkinchi tur oldidan bo‘lib o‘tgan teledebatlarda u “Ukraina donining Polsha bozorini to‘ldirib yuborishiga” va adolatsiz raqobat yaratishiga qarshi chiqqandi.
2025-yil may oyida Navrotskiy AQSHga tashrif buyurib, prezident Donald Tramp bilan uchrashgandi. Amerika prezidenti uchrashuvdan so‘ng Navrotskiy saylovlarda “albatta g‘alaba qozonishini” aytgandi. O‘tgan hafta esa AQSH ichki xavfsizlik vaziri Kristi Noem Varshavada konservativ siyosiy harakatlar bo‘yicha xalqaro konferensiyada Navrotskiyni maqtab, polyaklarni unga ovoz berishga chaqirgandi.
Rossiyada u Polsha hududidagi Qizil armiya yodgorliklarini buzishga aloqadorligi uchun qidiruvdagi shaxslar ro‘yxatiga kiritilgan. Navrotskiy avgust oyida muddati tugayotgan konservator Anjey Duda o‘rnini egallaydi.
Izoh (0)