Milliarder Ilon Mask o‘zining “Amerika” nomli partiyasi tuzilganini e‘lon qildi. Bu haqda tadbirkor X‘dagi sahifasida ma’lum qildi.
Partiya tuzish oldidan Mask obunachilari orasida “Amerika partiyasini tuzishimiz kerakmi?” degan so‘rovnomani o‘tkazgan. Bir sutka ichida unga 1,3 millionga yaqin odam ovoz bergan. Natijalarga asosan “ikki partiyaviy tizimdan mustaqil bo‘lish” g‘oyasini 65 foizdan ortiq ishtirokchi qo‘llab-quvvatlagan.
2 ga 1 nisbat: siz yangi siyosiy partiyani xohlaysiz va uni qo‘lga kiritasiz! Mamlakatimiz sarf-xarajatlar va korrupsiya tufayli bankrot bo‘lishi masalasiga kelganda, biz demokratiyada emas, bir partiyali tizimda yashayapmiz. Bugun “Amerika partiyasi” sizga ozodligingizni qaytarish uchun tuzildi, deb yozdi Ilon Mask ijtimoiy tarmoqdagi sahifasida.
Yangi partiya tuzish so‘rovnomasi AQSH prezidenti Donald Tramp tomonidan “katta va ajoyib” deb ta’riflangan soliq to‘g‘risidagi qonun imzolangani sabab bo‘ldi.
Dastlab qonun loyihasi Mask tomonidan qattiq tanqidga uchradi va bu holat uning Tramp bilan janjaliga sabab bo‘ldi. Qonunga ko‘ra, AQSH mudofaasi va chegaralarini qo‘riqlash xarajatlari oshib, ba’zi ijtimoiy dasturlarni moliyalashtirish qisqaradi. Mask esa bu biznesiga ta‘sir qilishidan xavotirda.
Milliarder qaror qabul qilinsa, “Amerika” partiyasini tuzish bilan tahdid qilgandi. AQSH prezidenti esa milliarderning biznesini subsidiyalardan mahrum qilishini aytgan. Natijada Mask “vatani Janubiy Afrikaga qaytish“ga majbur bo‘lishini aytgandi.
Mask va Tramp iyun oyi boshida yuqoridagi qonun loyihasi ustida ziddiyatga borgan edi. Milliarder bu tashabbusni “jirkanch” deb atagan hamda iqtisodiyot uchun salbiy oqibatlarga olib kelishini aytgan. AQSH prezidenti esa Ilon Mask qonun loyihasidan juda yaxshi xabardorligi, tadbirkor elektromobillar uchun imtiyozlar bekor qilinayotgani sabab norozi bo‘layotganini ta’kidlagan.
Bunga javoban Mask AQSH prezidentini yolg‘onchilikda ayblagandi. Keyinchalik milliarder prezident haqidagi bir nechta postlari uchun uzr so‘rab, “haddan oshib ketganini” tan olgan. Amerika yetakchisi, o‘z navbatida, Maskning uzrlarini “juda samimiy” deb atagandi.
Izoh (0)