Vengriya hukumati Ukrainaga Yevropa tinchlik jamg‘armasidan berilishi rejalashtirilgan navbatdagi harbiy yordam transhini ajratishni ma’qullamadi, deb xabar bermoqda Reuters hukumat matbuot xizmatiga tayanib.
“Vengriya Yevropa Ittifoqi boshqa mavjud vositalar qatori Yevropa tinchlik jamg‘armasidan faqat Ukraina uchun foydalanilishiga rozi emas, chunki bu boshqa sohalarda Yevropa Ittifoqi manfaatlarini ilgari surish uchun yetarli mablag‘ ajratish imkonidan mahrum qiladi”, — deyiladi matbuot xizmati xabarida.
Vengriya hukumati YTJdan sakkizinchi yordam transhining ajratilishiga boshqa muammolarni namoyon qilish uchun to‘sqinlik qilganini ta’kidladi. Vengriya vakillari jamg‘arma mablag‘laridan Bolqon va Shimoliy Afrikada foydalanish mumkinligini ta’kidladi.
Vengriyaning Ukrainaga yordam ajratilishini bloklash qarori haqida birinchi bo‘lib Italiyaning ANSA agentligi manbalarga tayanib xabar bergan. Unga ko‘ra, yordam miqdori 500 million yevroni tashkil qilardi.
Yevropa tinchlik jamg‘armasi 2021-yil mart oyida tashkil etilgan. U Yevropa Ittifoqiga aʼzo davlatlarning badallari hisobidan moliyalashtiriladi. Jamg‘arma doirasida Ukraina Yevropa Ittifoqidan 3,6 milliard yevroga yaqin mablag‘ oldi. Ukrainadan tashqari, YTJ qator davlatlarga, jumladan Gruziya, Moldova, Mali, Somali va Livanga mudofaa yordamini moliyalashtirib kelgan.
Yevropa Ittifoqi va NATO aʼzosi bo‘lgan Vengriya Rossiyaning keng ko‘lamli bosqinidan so‘ng Ukrainaga birorta harbiy yordam ko‘rsatishdan bosh tortdi, shuningdek, bir qator sanksiyalar joriy etilishiga qarshi chiqdi. 2022-yilda Vengriya Ukrainaga 18 milliard yevrolik yordam dasturini bloklagan. Bundan tashqari, mart oyida Vengriya Rossiya prezidenti Vladimir Putinni hibsga olish bo‘yicha xalqaro order to‘g‘risidagi Yevropa Ittifoqining qo‘shma bayonotini bloklagan.
Izoh (0)