Shimoliy Koreya rahbari Kim Chen In ochilganiga uch hafta ham bo‘lmagan turistik kurortni xorijliklar uchun yopib qo‘ydi. Bu haqda Bild nashri xabar bermoqda.
Ma’lum qilinishicha, DPR Korea Tour davlat sayti Yapon dengizi bo‘yida joylashgan ulkan kurort “vaqtincha xorijiy sayyohlarni qabul qilmayotgani” haqida qisqa xabar e’lon qilgan. Sababi hamda qancha muddat sayyohlarni qabul qilmasligi haqida ma’lumot berilmagan. Biroq ayrim nashrlar kurortning yopilishini Rossiya tashqi ishlar vaziri Sergey Lavrov tashrif buyurgani bilan bog‘lamoqda.
Ta’kidlanishicha, o‘tgan ikki hafta mobaynida kurortga faqat shimoliy koreyaliklar va rossiyaliklarning kichik guruhi tashrif buyurishga ulgurgan.
Bundan avval 1-iyul kuni Shimoliy Koreya tarixda birinchi marta o‘zining plyaj kurorti ochilishi xabar qilingandi. “Wonsan Kalma” nomli kurort Shimoliy Koreyaning sharqiy sohilida qurib bitkazilgan.
Kim Chen Inning yoshlik davrlari kurort joylashgan Vonsan hududida o‘tgan. U yerda mamlakatning ko‘plab elitalari shaxsiy villalarga ega. Vonsan bir vaqtlar raketa poligoni joylashgan shahar edi. Mamlakat rahbari hozirda hududni o‘zgartirishga harakat qilmoqda.
Dam olish maskani 20 000 kishi tashrif buyurishiga mo‘ljallangan. Kurort plyajning 4 kilometr hududini egallab, o‘z ichiga mehmonxona, restoran, savdo markazlari va akvaparklarni oladi. U dastlab 2019-yil oktyabr oyida ochilishi kerak edi, ammo Covid pandemiyasida qurilish ishlari kechiktirilgan.
Izoh (0)