Rossiya xavfsizlik kengashi kotibi Sergey Shoygu 17-iyun kuni Rossiya prezidenti Vladimir Putinning maxsus topshirig‘i bilan Shimoliy Koreya poytaxti Pxenyanga keldi. Bu haqda Anadolu xabar berdi.
Kotib Pxenyanga avvalgi tashrif chog‘ida erishilgan kelishuvlarni amalga oshirish doirasida KXDR rahbariyati bilan muzokaralar o‘tkazish uchun kelgani aytilmoqda. Ushbu kelishuvlar Rossiya Federatsiyasi va KXDR o‘rtasida har tomonlama strategik sheriklik to‘g‘risidagi shartnoma doirasida amalga oshirilayotgani ma’lum qilingan.
Shoygu Shimoliy Koreyaga so‘nggi 3 oy ichida uchinchi bor keldi. 4-iyun kuni bo‘lib o‘tgan so‘nggi uchrashuvda Shoygu va KXDR rahbari Ukrainadagi vaziyat va Kursk viloyatini tiklashni muhokama qilgandi. Uchrashuvda imzolangan Keng qamrovli strategik sheriklik to‘g‘risidagi shartnomaga muvofiq Rossiya va KXDR o‘rtasidagi ikki tomonlama munosabatlarni rivojlantirish istiqbollari muhokama qilingandi.
Bungacha esa kotib 21-mart kuni KXDRga tashrif buyurgan edi. O‘shanda uni Kim Chen In shaxsan qabul qilgan. Shoyguning ma’lum qilishicha, u KXDR rahbariga Rossiya prezidenti Vladimir Putinning murojaatini yetkazgan, Ukraina va Rossiya hamda AQSH o‘rtasida muloqot boshlanishi masalalari muhokama qilingan.
Izoh (0)