AQSH, Yaponiya va Janubiy Koreya Qurolli kuchlari 11-iyul kuni B-52H strategik bombardimonchi samolyoti ishtirokida aviatsiya mashg‘ulotlarini o‘tkazdi. Bu haqda Yonhap axborot agentligi xabar bermoqda.
Janubiy Koreya Mudofaa vazirligi ma’lumotlariga ko‘ra, mashg‘ulotlar Janubiy Koreyaning Chejudo oroli bo‘lib o‘tgan. Mashqlarda AQShning kamida bitta B-52H bombardimonchi samolyoti, shuningdek, Janubiy Koreyaning KF-16 va Yaponiyaning F-2 qiruvchi samolyotlari ishtirok etgan.
Qayd etilishicha, bu joriy yilda Koreya yarimoroli yaqinida strategik bombardimonchi samolyotning birinchi joylashtirilishi bo‘ldi.
Ta’kidlanishicha, yaqin hamkorlik asosida uch mamlakat Shimoliy Koreya tahdidlariga qarshi birgalikda kurashish va ularga javob qaytarish uchun hamkorlik qiladi hamda uch tomonlama mashg‘ulotlarni davom ettiradi.
Mashg‘ulotlar xavfsizlik bilan bog‘liq vaziyat va xavfsizlik sohasida uch tomonlama hamkorlikni mustahkamlash yo‘llarini muhokama qilish uchun Seulda uch mamlakatning oliy harbiy zobitlari uchrashuvi fonida o‘tkazilgan.
Bundan avval Tayvan har yili o‘tkaziladigan “Xanguang” harbiy mashg‘ulotlarini bu yil eng yirik masshtabda o‘tkazishi haqida xabar qilingandi.
Mart oyida AQSH va Janubiy Koreya Freedom Shield (Ozodlik qalqoni 2025) mintaqaviy tahdidlarga qarshi mudofaa qobiliyatini mustahkamlash maqsadida qo‘shma harbiy mashg‘ulotlarini o‘tkazgandi.
Izoh (0)