Ukraina bilan urushda 2025-yilning boshidan beri Rossiyaning 100 mingdan ortiq askari halok bo‘lgan. Bu haqda NATO bosh kotibi Mark Ryutte 14-iyul, dushanba kuni Oq uyda Donald Tramp bilan uchrashuv chog‘ida ma’lum qildi.
“Biz bu masalada kelishuvga ancha oldin erishishimiz kerak edi. Ammo (urush) hamon davom etmoqda. Har kecha odamlar halok bo‘lmoqda. Ko‘plab rus askarlari ham, ukrainaliklar ham o‘lyapti”, dedi AQSH prezidenti.
Ryutte uning gapini davom ettirib, shunday dedi:
“Yil boshidan beri 100 ming rus askari halok bo‘ldi. Agar Moskvada kimdir eshitib turgan bo‘lsa, yana takrorlayman: yanvardan beri 100 ming rus halok bo‘ldi. Putin ayni shu ishlarga sababchi bo‘lmoqda”.
Ryutte Istanbuldagi muzokaralar haqida
NATO bosh kotibi Rossiya prezidenti “muzokaralarga jiddiy odamlarni yubormaganini” eslatdi. Unga ko‘ra, ushbu uchrashuvni AQSH tashkil qilishga harakat qilgan.
“Biz ukrainaliklarga Istanbulga yuqori darajadagi delegatsiyani yuborish uchun bosim o‘tkazdik. Ular buni amalga oshirdi. Ammo keyin rossiyaliklar paydo bo‘lishdi. Ular bilan birga tarixchi kelib, 1250-yildan boshlab Rossiya tarixini tushuntirishni boshladi”, dedi Ryutte. (Vladimir Medinskiy nazarda tutilgan — tahr).
Tramp ushbu fikrlarga qo‘shimcha qildi:
“Men to‘rt marta kelishuvga erishdik, deb o‘yladim. Ammo biz hanuz shu mavzuda gaplashyapmiz”.
Rossiyaliklarning Ukrainadagi yo‘qotishlari
2025-yil 14-iyul holatiga ko‘ra, “Mediazona” va BBC rus xizmati Ukrainadagi halok bo‘lgan 118 139 rossiyalikning ismini aniqlashga erishgan. Manbalar mamlakatning umumiy yo‘qotishlarini 165 ming kishi deb baholamoqda.
Rossiya armiyasi tarkibida halok bo‘lgan 500 nafardan ortiq askar chet el fuqarolaridir.
Ma’lumotlarga ko‘ra, Rossiya armiyasi safida jang qilgan xorijliklar 28 ta davlatdan bo‘lgan. Qurbonlar soni bo‘yicha birinchi o‘rinda, katta ehtimol bilan, Shimoliy Koreya fuqarolari turadi. Janubiy Koreya razvedkasi ma’lumotiga ko‘ra, urushda halok bo‘lgan shimoliy koreyaliklar soni 600 nafarga yetishi mumkin. Biroq bu borada rasmiy ma’lumotlar mavjud emas.
Xorijlik qurbonlar ichida Tojikiston fuqarolari (72 kishi) yetakchilik qilmoqda. Ikkinchi o‘rinda O‘zbekiston (66 nafar) fuqarolari turadi.
Ukraina Qurolli Kuchlari Bosh shtabi iyun oyida Rossiyaning umumiy yo‘qotishlari urush boshidan buyon 1 million kishi (halok bo‘lgan va yaralanganlar)ni tashkil etishini bildirgan. Xuddi shunday bahoni Vashingtondagi Strategik va xalqaro tadqiqotlar markazi (CSIS) ham bergan. NATO esa aprel oyida 250 ming o‘lik va 650 ming yarador rossiyalik haqida ma’lum qilgan.
Izoh (0)