Ukrainaga qarshi urushda Rossiya armiyasi safida jang qilgan 66 nafar O‘zbekiston fuqarosi halok bo‘ldi. Urush davomida 118 139 nafar Rossiya harbiysi qurbon bo‘lgan, shulardan 500 dan ortig‘i chet el fuqarolaridir. Bu haqda BBC va “Mediazona” nashrlari xabar berdi.
Ma’lumotlarga ko‘ra, Rossiya armiyasi safida jang qilgan xorijliklar 28 ta davlatdan bo‘lgan. Qurbonlar soni bo‘yicha birinchi o‘rinda, katta ehtimol bilan, Shimoliy Koreya fuqarolari turadi. Janubiy Koreya razvedkasi ma’lumotiga ko‘ra, urushda halok bo‘lgan shimoliy koreyaliklar soni 600 nafarga yetishi mumkin. Biroq bu borada rasmiy ma’lumotlar mavjud emas.
Xorijlik qurbonlar ichida Tojikiston fuqarolari (72 kishi) yetakchilik qilmoqda. Ikkinchi o‘rinda O‘zbekiston (66 nafar) fuqarolari turadi. Tojikistondan 43 kishi va O‘zbekistondan 46 kishi qamoq jazosini “nollashtirishga” uringan. Ularning aksariyati “Vagner” xususiy harbiy kampaniyasi bilan shartnoma imzolagan.
Huquq faollari fikricha, Rossiyaning bosqini Markaziy Osiyodan kelgan migrantlarga nisbatan bosim o‘tkazish vositasiga aylangan. Ular urushda qatnashish evaziga, masalan, Rossiyaga kirish taqiqining olib tashlanishi, fuqarolikni tezlashtirilgan tartibda olish yoki deportatsiyaning bekor qilinishi kabi va’dalar bilan aldangan. Advokatlar ko‘plab migrantlar tahdid orqali Rossiya Mudofaa vazirligi bilan shartnoma tuzishga majburlanganini qayd etgan.
Postsovet hududlaridan kelganlar orasida Gruziya fuqarolarining yo‘qotishlari ajralib turadi — 63 kishi. Ularning aksariyati 1991–1993-yillarda Gruziya nazoratidan chiqqan Janubiy Osetiya va Abxaziya hududlarining aholisi hisoblanadi. Kavkazdan bo‘lgan ko‘ngillilar orasida urushga professional harbiylar va ofitserlar ham jalb qilingan.
MDHdan tashqarida halok bo‘lgan chet elliklar orasida Nepal (70 kishi) yetakchilik qilmoqda, 50 nafar nepallik bedarak yo‘qolgan. Nepal hukumati Rossiyaga DNK namunalarini yuborib, o‘z fuqarolarini aniqlashga urinmoqda.
Rossiya safida jang qilganlar orasida Afrika davlatlari — Efiopiya, Zambiya, Markaziy Afrika Respublikasi, Tanzaniya va Togodan fuqarolar ham bor. Shri Lanka hukumatiga ko‘ra, mamlakatning kamida 288 nafar iste’fodagi harbiysi Rossiya armiyasiga yollangan, ulardan 16 nafari halok bo‘lgan.
AQSH razvedkasi ta’kidlashicha, Rossiya safida “sanoqli” amerikaliklar bor, Ukraina armiyasida esa 2–3 mingga yaqin amerikalik ko‘ngillilar jang qilmoqda. Shuningdek, Rossiya qurolli tuzilmalarida xizmat qilib, urushda halok bo‘lgan 54 nafar Ukraina fuqarosi aniqlangan. Ular urush boshlanishi chog‘ida Ukraina nazoratida bo‘lgan hududlarda doimiy ro‘yxatda turgan shaxslardir.
Izoh (0)