NATO Ukrainani zarur harbiy yordam bilan ta’minlashda davom etishi haqida alyans bosh kotibi Mark Ryutte 24-iyun kuni Gaagadagi matbuot anjumanida ma’lum qildi. Bu haqda Moscow Times xabar berdi.
Kotibga ko‘ra, ishtirokchi davlatlar Kiyevga mudofaa ehtiyojlari uchun 35 milliard yevro ajratishga kelishib olgan.
“Ukrainani qo‘llab-quvvatlashimiz o‘zgarmas bo‘lib qoladi. Yangi hisob-kitoblar shuni ko‘rsatadiki, Yevropa ittifoqchilari va Kanada kelgusi yil davomida Ukrainaga 35 milliard yevrodan ortiq qo‘shimcha xavfsizlik yordamini taqdim etish bo‘yicha sa’y-harakatlarini kuchaytirgan”, dedi Ryutte.
Uning qo‘shimcha qilishicha, bu qaror alyansning Ukrainani qo‘llab-quvvatlashga sodiqligini tasdiqlaydi.
“Shuning uchun NATO ittifoqchilari 2024-yili Vashingtonda Ukrainaning alyansga qo‘shilishi bekor bo‘lmasligi haqida kelishib olgan. Bu bugun ham dolzarb bo‘lib qolmoqda va sammitdan keyin ham dolzarb bo‘ladi”, dedi bosh kotib.
Ryutte, shuningdek, AQSHdan yordam hajmi qisqarganiga qaramay, alyans Ukrainani qo‘llab-quvvatlashda birdamligini ta’kidlagan.
Alyans rahbari Moskva tomonidan davom etayotgan tahdidga alohida e’tibor qaratgan. Rossiya Federatsiyasi NATO uchun eng jiddiy va bevosita tahdid bo‘lib qolayotgani hamda Moskva Shimoliy Koreya, Eron, Xitoy va Belarus yordamiga tayanib Ukrainaga qarshi urushni davom ettirayotgani” ham ta’kidlab o‘tilgan.
Izoh (0)