Shimoliy Koreya may oyida muvaffaqiyatsizlikka uchrab ag‘darilib ketgan esminetsni suvga tushirishga muvaffaq bo‘ldi. Bu haqda CNN xabar berdi.
Davlat ommaviy axborot vositalarining xabar berishicha, shikastlangan kema ta’mirlash uchun boshqa kemasozlik zavodidagi quruq dokka ko‘chiriladi.
“Iyun oyi boshida esminets muvozanatini tiklaganidan so‘ng, jamoa 5-iyun kuni kemani qayta suvga tushirdi”, deyiladi Koreya markaziy axborot agentligi (KCNA) xabarida.
Planet Labs tomonidan 5-iyun kuni olingan sun’iy yo‘ldosh fotosurati ilgari halokatga uchragan kemaning ta’mirlangani va qayta suvga tushirilganini ko‘rsatgan.
5 ming tonnalik esminets mamlakatning eng yangi harbiy kemasi bo‘lib, Shimoliy Koreyaning dengizni modernizatsiya qilish bo‘yicha ulkan sa’y-harakatlarining g‘alabasi hisoblanishi aytilgan.
21-may kuni ishga tushishi kerak bo‘lgan kema mexanizmidagi nosozlik tufayli shikastlangandi. Shimoliy Koreya yetakchisi Kim Chen In shimoli-sharqdagi Chongjin shahridagi bu voqeaga guvoh bo‘lib, uni “jinoiy harakat” deb atagan. Hukumat tezda halokatga aybdor deb gumonlangan 4 kishini hibsga olganini ma’lum qilgandi.
Izoh (0)