O‘zbekiston terma jamoasi bugun, 5-iyun kuni, Jahon chempionati saralashi 9-tur doirasidagi navbatdagi uchrashuvini o‘tkazadi. Temur Kapadze boshchiligidagi jamoa Abu-Dabida BAA mehmoni bo‘ladi. Ushbu bellashuvda qo‘lga kiritiladigan bir ochko ham “oq bo‘rilar”ga Jahon chempionati chiptasini taqdim etishi mumkin.
Ushbu o‘yin oldidan har ikki terma jamoaning hozirgi holati, JCHga chiqish imkoniyatlari va tarkibidagi eng qimmat futbolchilari haqida batafsil to‘xtalamiz.
O‘zbekiston terma jamoasi
O‘zbekiston terma jamoasi Mundial saralashining dastlabki o‘yinida Toshkentda Shimoliy Koreyaga qarshi 1:0 hisobida g‘alaba qozondi. Keyingi turda Bishkekka safar uyushtirib, Qirg‘izistondan 3:2 hisobida ustun keldi. Uchinchi turda esa “Bunyodkor” stadionida Eron bilan bahs olib bordi va 0:0 hisobidagi durang qayd etildi.
Toshkentda o‘tgan navbatdagi o‘yinda terma jamoa BAAni qabul qildi va Otabek Shukurovning penaltidan kiritgan yagona goli evaziga 3 ochko qo‘lga kiritildi.
Beshinchi turda O‘zbekiston Dohada Qatar bilan to‘qnash keldi. Birinchi taymda ketma-ket ikkita gol o‘tkazib yuborgan bo‘lsa, ikkinchi bo‘limda Abbosbek Fayzullayevning dubli hisobga tenglashtirdi. Ammo uchrashuv oxirida Qatar yana bitta gol urib, 3:2 hisobida g‘alabani qo‘lga kiritdi.
O‘zbekiston oltinchi turda Shimoliy Koreya bilan Laosda o‘yin o‘tkazdi — siyosiy vaziyatlar sababli o‘yin safarda bo‘lib o‘tdi. Qiyin bahsda jamoa 1:0 hisobida g‘alaba qozondi. 7-turda Qirg‘izistonni Toshkentda 1:0 hisobida mag‘lub etdi, 8-turda esa Eronda 2:2 hisobida durang o‘ynadi.
BAA terma jamoasi
Birlashgan Arab Amirliklari terma jamoasi Jahon chempionati saralashini ancha ishonchli boshladi. Ular ilk turda Qatarga safar uyushtirib, 3:1 hisobida g‘alaba qozondi. Biroq 2-tur doirasidagi Eronga qarshi bellashuvda minimal hisobda imkoniyatni boy berdi — 0:1. Amirliklar jamoasi 3-turda Shimoliy Koreya bilan 1:1 hisobida durang o‘yagan bo‘lsa, 4-turda Toshkentda O‘zbekistonga imkoniyatni boy berdi — 0:1.
5 va 6-turda BAA yirik hisobdagi ikkita g‘alabani qo‘lga kiritdi. Avvaliga Qirg‘izistonni 3:0 hisobida mag‘lub etgan bo‘lsa, keyin Qatar darvozasiga javobsiz 5 ta gol urishni uddaladi. 7-turda Eronga yana mag‘lub bo‘ldi — 0:2. 8-turda esa Shimoliy Koreyaga qarshi bahs o‘tqazib, 2:1 hisobidagi qiyin g‘alabani qo‘lga kiritdi.
A guruhi turnir jadvali
- Eron — 20 ochko
- O‘zbekiston — 17 ochko
- BAA — 13 ochko
- Qatar — 10 ochko
- Qirg‘iziston — 6 ochko
- Shimoliy Koreya — 2 ochko
Jamoalarning saralash bosqichidagi to‘purarlari
O‘zbekiston terma jamoasi ortda qolgan 8 turda 11 ta gol urishni uddalagan. Abbosbek Fayzullayev 4 marta raqib darvozasini ishg‘ol qilib, “oq bo‘rilar” to‘purari bo‘lib turibdi.
Qolgan 7 gol esa 7 nafar futbolchi nomiga yozilgan. Eldor Shomurodov, Jaloliddin Masharipov, Hojiakbar Alijonov, Oston O‘runov, Otabek Shukurov, Husniddin Aliqulov va Hojimat Erkinov bir martadan raqib darvozasini ishg‘ol qilgan.
Birlashgan Arab Amirliklar terma jamoasi gol urish borasida ancha faol. Amirliklar o‘tgan 8 tur davomida 14 marta raqib darvozasiga yo‘l topa olgan. Fabio Lima nafaqat BAAning, balki butun saralash bosqichining eng yaxshi to‘purarlaridan biri bo‘lib turibdi. Asli kelib chiqishi braziliyalik bo‘lgan hujumchi hozirgacha 5 ta gol va 2 assist bilan to‘purarlar jadvalida yetakchilik qilmoqda. Amirliklar safida ikkinchi to‘purar esa Harib Suhayil hisoblanadi. “Al-Ahli” hujumchisi hisobida 3 ta gol mavjud.
O‘zaro uchrashuvlar tarixi
O‘zbekiston shu vaqtgacha BAAga qarshi 18 bor maydonga tushgan. Shulardan 5 uchrashuvda g‘alaba qozongan, 9 o‘yinda imkoniyatni boy bergan, yana 4 bahs durang bilan yakunlangan.
Mazkur jamoalar o‘rtasidagi ilk uchrashuv 1996-yilda bo‘lib o‘tgan. Unda Amirliklar jamoasi 4:2 hisobida g‘alaba qozongan.
O‘zbekiston terma jamoasi shu vaqtgacha BAA darvozasini 20 bor ishg‘ol qilgan, biroq o‘z darvozasidan 25 ta gol o‘tkazib yuborgan.
Ushbu jamoalar o‘rtasidagi bahs to‘purarlari — Igor Sergeyev va Server Jeparov, har ikki futbolchi ham 3 martadan raqib darvozasini ishg‘ol qilgan. BAA safidan Ali Mabhout 2 bora O‘zbekiston darvozasiga yo‘l topishni uddalagan.
2000-yilda Amirliklar O‘zbekistonni 4:1 hisobida mag‘lub etib, o‘z tarixidagi eng yirik g‘alabani qo‘lga kiritgan, biroq O‘zbekiston bunga 2015-yilda 4:0 hisobidagi yirik g‘alaba bilan javob qaytargan.
Eng qimmat futbolchilar
O‘zbekiston Osiyo qit’asida eng qimmat 3-jamoa hisoblanadi. Hozirda Temur Kapadze boshchiligidagi “Oq bo‘rilar”ning umumiy qiymati 68,3 million yevroni tashkil qiladi.
Tarkibdagi eng qimmat futbolchi — “Manchester Siti” a’zosi Abduqodir Husanov. Himoyachi Transfermarkt tomonidan 35 million yevroga baholanmoqda. Keyingi o‘rinlarda — Abbosbek Fayzullayev (8 million yevro) va Eldor Shomurodov (4 million yevro) joy olgan.
O‘zbekistonning eng qimmat 10 nafar futbolchisi:
- Abduqodir Husanov — 35 million yevro;
- Abbosbek Fayzullayev — 8 million yevro;
- Eldor Shomurodov — 4 million yevro;
- Oston O‘runov — 2 million yevro;
- Otabek Shukurov — 1,8 million yevro;
- Husniddin Aliqulov — 1,7 million yevro;
- Jaloliddin Masharipov — 1,5 million yevro;
- Abduvohid Ne’matov — 1,5 million yevro;
- Hojimat Erikinov — 1,5 million yevro
- Akmal Mozgovoy — 1,3 million yevro.
Birlashgan Arab Amirliklari terma jamoasining umumiy qiymati 44 million yevroni tashkil qiladi. Jamoaning eng qimmat futbolchisi Fabio Lima hisoblanadi. Hujumchining qiymati Transfermarkt portalida 6,5 million yevroga baholangan. Ikkinchi pog‘onadan Luan Perreyra joy olgan. “Sharja” klubi futbolchisining narxi 5 million yevro etib belgilangan. 3-pog‘onadan Kayo Lukas joy olgan. Asli kelib chiqishi braziliyalik bo‘lgan futbolchining transfer narxi 4,5 million yevro hisoblanadi.
BAAning eng qimmat 10 nafar futbolchisi:
- Fabio Lima — 6,5 million yevro;
- Luan Perreyra — 5 million yevro;
- Kayo Lukas — 4,5 million yevro;
- Holid Ibrohim — 2,5 million yevro;
- Ala Zir — 2,5 millon yevro;
- Lukas Pimento — 2,5 millon yevro;
- Oton Kuadio — 2,5 millon yevro;
- Harib Suhayil — 2,2 millon yevro;
- Markus Meloni — 2,2 million yevro;
- Yahyo Nodir — 2 million yevro.
Murabbiylar fikri:
Temur Kapadze BAAga qarshi bahs oldidan matbuot anjumanida qatnashdi.
Albatta, o‘rganib chiqdik. Har taraflama yaxshi tayyorgarlik ko‘rdik. To‘g‘ri, ularda murabbiy yangi. Biroq bugun paydo bo‘lib qolmagan. Ularni o‘rganishga harakat qildik. Asosiysi, o‘z o‘yinimiz haqida o‘ylashimiz va yaxshi o‘yin ko‘rsatishimiz lozim. Albatta, bu davrga yetib kelish uchun futbolchilar astoydil mehnat qilishdi. Bizni ikkita muhim o‘yin kutib turibdi. Hammasi o‘z qo‘limizda. Ertaga g‘alaba qozonib, keyingi o‘yinga tayyorlanishimiz kerak. Srechko Katanesning sog‘lig‘i joyida. Uning yordamchilari esa bugungi kunda mening shtabimda faoliyat yuritmoqda.
Kosmin Olariu O‘zbekistonga qarshi bahs oldidan matbuot anjumanida qatnashdi.
Bu oson bo‘lmasligi aniq, ammo biz barchasiga tayyormiz. Ertaga juda qiyin o‘yin bo‘ladi. O‘zbekiston guruhdagi eng yaxshi jamoalardan biri. Ular juda tartibli va balans futbol namoyish etishmoqda. Biz so‘nggi bir hafta davomida imkon qadar yaxshi tayyorgarlik ko‘rishga harakat qildik. Endi esa yigitlarni to‘g‘ri yo‘naltirishi va motivatsiya berishimiz kerak. Katta o‘yin va katta jang. Biz o‘zimizning imkoniyatimizga ishonamiz. Bor kuchimiz bilan kurashamiz.
Uchrashuv haqida:
BAA — O‘zbekiston terma jamoalari o‘rtasidagi bahs 5-iyun, payshanba kuni Abu-Dabidagi “Al-Nahyan” stadioida bo‘lib o‘tadi. Bellashuv O‘zbekiston vaqti bilan 21:00 da boshlanadi.
Izoh (0)