Toshkent viloyatining ikki tumanida noqonuniy diniy ta’lim tashkil etganlar jazolandi

Toshkent viloyatining ikki tumanida bolalar uchun noqonuniy diniy ta’lim tashkil etilgani aniqlandi.

Davlat xavfsizlik xizmati va Ichki ishlar vazirligi xodimlari hamkorligida o‘tkazilgan tezkor tadbirlar davomida, 21 yoshli va 43 yoshli ikki nafar ishsiz fuqaro noqonuniy diniy o‘qish tashkil qilgani fosh etildi. Jumladan, 21 yoshli fuqaro Toshkent viloyati Zangiota tumanidagi xonadonda 31 nafar bolaga, 43 yoshli fuqaro esa Toshkent tumanidagi xonadonda 12 nafar voyaga yetmagan bolaga diniy saboq bergan.

Noqonuniy faoliyat yuritgan mazkur shaxslar hamda bolalarni tarbiyalash majburiyatlarini bajarmagan ota-onalarga nisbatan qonunlarda belgilangan tartibda jazo tayinlandi.

Ma’muriy javobgarlik to‘g‘risidagi kodeksning 47-moddasiga ko‘ra, ota-onalar yoki ularning o‘rnini bosuvchi shaxslar tomonidan o‘z bolasini qonunga xilof ravishda diniy ta’lim olishga jalb etish BHMning 5 baravaridan 10 baravarigacha miqdorda jarima solishga sabab bo‘ladi.

Maxsus diniy ma’lumoti bo‘lmay turib va diniy tashkilot boshqaruvi markaziy organining ruxsatisiz diniy ta’limotdan saboq berish, xuddi shuningdek, xususiy tartibda diniy ta’limotdan saboq berish esa BHMning 5  baravaridan 10 baravarigacha miqdorda jarima solishga yoki 15 sutkagacha muddatga ma’muriy qamoqqa olishga sabab bo‘ladi. Bu kodeksning 241-moddasida belgilangan.

Bundan bir necha kun avval Farg‘ona viloyatining Yozyovon, Qo‘shtepa, Dang‘ara, Farg‘ona tumanlarida bolalarga noqonuniy diniy saboq berganlar qo‘lga tushgandi.