AQSH prezidenti Donald Tramp Eronning o‘z yadro dasturi bo‘yicha xalqaro tekshiruvlar o‘tkazilishiga rozilik bermagani va uranni boyitishdan voz kechmaganini ma’lum qildi. Bu haqda u Oq uyda Mustaqillik kuni nishonlanganidan so‘ng, Nyu Jersiga yo‘l olayotgan samolyotda jurnalistlarga aytib o‘tgan.
“Menimcha, ularning dasturi butunlay to‘xtatilgan. Agar ular yana boshlashga urinishsa, ehtimol, boshqa obyektda bo‘ladi. Agar boshlashsa, bu muammoga aylanadi”, dedi Tramp.
Trampning aytishicha, dushanba kuni Isroil bosh vaziri Binyamin Netanyaxuning Vashingtonga tashrifi chog‘ida u bilan Eron yadro masalasini muhokama qiladi. Shuningdek, prezident Eron yadro dasturining qayta tiklanishiga yo‘l qo‘ymasligini ta’kidlab, Tehron go‘yoki u bilan muzokaralarga tayyorligini bildirayotganini qo‘shimcha qilgan.
Bundan avval Eron parlamenti allaqachon yadro infratuzilmasining xavfsizligi va daxlsizligi kafolatlanmaguncha Xalqaro atom energiyasi agentligi (MAGATE) bilan hamkorlikni to‘xtatib turish to‘g‘risidagi qonunni qabul qilgandi.
Isroil 13-iyun kechasi Eronga zarbalar berishni boshladi. Ularning maqsadi Tehronning yadro va raketa dasturlari bilan bog‘liq obyektlar edi. Bir sutkadan kamroq vaqt o‘tib, Eron javob hujumini amalga oshirdi. 22-iyun kechasi AQSH Qurolli kuchlari Eronning uchta yadroviy obyektiga hujum qildi, 23-iyun kechqurun esa Tehron Qatardagi Yaqin Sharqning eng yirik Al-Udeyd Amerika havo bazasiga raketa zarbalari berdi. Keyinroq AQSH prezidenti Donald Tramp Isroil va Eron o‘t ochishni to‘xtatish rejimiga kelishib olganini ma’lum qildi. Bu kelishuv 24-iyundan kuchga kirdi.
Izoh (0)