AQSH razvedkasi Eronning hujumga uchragan yadroviy obyektlari to‘liq yo‘q qilinmaganini ta’kidladi. Bu haqda Mudofaa vazirligidagi manbalarga tayanib, CNN va The New York Times xabar berdi.
Pentagon hisobotida keltirilishicha, AQSHning Fordo, Natanz va Isfahon yadro obyektlariga uyushtirgan zarbalari Eron yadro dasturini atigi bir necha oy orqaga surgan. Mazkur obyektlardagi boyitilgan uran zaxiralari hujum oldidan boshqa joyga ko‘chirilgan bo‘lishi mumkin. Uranni boyitish uchun zarur bo‘lgan sentrifugalar esa “asosan zararlanmagani” ta’kidlanadi.
CNNning yozishicha, AQSH zarbalari oqibatida eng katta zarar Eron yadro obyektlarining yer ustidagi inshootlarga yetgan. Ko‘plab harbiy ekspertlar AQSHning yadroviy obyektlarga hujum qilishiga Isroil ko‘ndirganini aytmoqda. Chunki AQSHning maxsus GBU-57A bunker bombalari Fordodagi tog‘ ostiga yashirilgan obyektga zarba bera oladi.
Bundan tashqari, The New York Times’ning isroillik amaldorlarga tayanib yozishicha, Eron hududida kichik, maxfiy uran boyitish markazlari zararsiz qolgan. Tehron bu markazlarni aynan Fordo va Isfahon kabi yirik komplekslar yo‘q qilingan taqdirda ham yadro dasturini davom ettirish uchun qurgan.
NYT ma’lumotlariga ko‘ra, AQSH razvedkasining muvaffaqiyatsiz bombardimon haqidagi xulosalarini e’lon qilish Trampning hozir bo‘lib o‘tayotgan NATO sammitidagi g‘alabasini barbod qilgan. AQSH prezidenti Donald Tramp yuqoridagi razvedka xulosalariga qo‘shilmagan.
Feyk ma’lumotlar tarqatuvchi CNN va inqirozga yuz tutgan The New York Times tarixdagi eng muvaffaqiyatli harbiy hujumlardan birini obro‘sizlantirishga urinish maqsadida birlashdi. Eron yadro obyektlari to‘liq yo‘q qilingan! The Times ham, CNN ham jamoatchilik tomonidan keskin tanqid ostiga olinmoqda! deb yozdi u Truth Social’s sahifasida.
Oq uy matbuot kotibi Kerolin Livitt ham o‘z rahbariga qo‘shildi. U ommaviy axborot vositalarining shubhalarini “prezidentni kamsitishga urinish” va “jasur uchuvchilarni obro‘sizlantirish” deb baholadi. Shuningdek, CNN “razvedka xizmatidagi past lavozimli nomalum shaxs”dan ma’lumot olganini aytdi.
30 ming funt bo‘lgan o‘n to‘rtta bomba nishonga aniq tushirilsa, to‘liq vayronagarchilik bo‘lishini hamma biladi, deb yozdi u X’dagi sahifasida.
Izoh (0)