Sun’iy yo‘ldoshdan olingan so‘nggi tasvirlar Eronning AQSH tomonidan bombardimon qilingan Fordo yadroviy boyitish zavodida ishlar davom etayotganini ko‘rsatmoqda. Bu haqda CNN xabar berdi.
Tasvirlar 30-iyun kuni Maxar Technologies kompaniyasi tomonidan taqdim etilgan. Unga ko‘ra, yadroviy obyektdagi ventilyatsiya shaxtalari va havo hujumlari oqibatida yuzaga kelgan chuqurlar atrofida harakatlar davom etayotgani aks etgan. Jumladan, ekskavator, kran va bir nechta xodimlar ko‘ringan, qo‘shimcha transport vositalari qayd etilgan.
Amerikaning B-2 bombardimonchi samolyotlari iyun oyida Eronning Fordo va Natanz yadroviy obyektlariga o‘ndan ortiq bunker bombalarini tashlagandi. AQSH suvosti kemasidan uchirilgan Tomahawk raketalari esa Eron markazidagi Isfahon obyektiga zarba bergandi. Massive Ordnance Penetrator bombalari Fordodagi ikkita ventilyatsiya shaxtasini nishonga olgandi.
AQSH Ilm-fan va xalqaro xavfsizlik institutini boshqarayotgan sobiq yadro inspektori Devid Olbraytga ko‘ra, Eronning bu faoliyati “zararlarni baholash va ehtimol radiatsion namunalarni olishdan” iborat. Asosiy shaxtalar ustidagi aviahujumdan hosil bo‘lgan chuqurlar esa ochiq qolmoqda.
“Eronliklar yadro obyektlarining asosiy kirish yo‘lidagi bomba o‘choqlarini tezda ta’mirlaganiga guvoh bo‘ldik. Biroq tunnelga kirish yo‘llarining birortasini qayta ochish bo‘yicha hali hech qanday harakatlar qilinmadi”, dedi Devid.
BMTning yadroviy agentligi 29-iyun kuni Eronga berilgan zarbalar uning yadroviy dasturiga “to‘liq zarar yetkazmaganini va Tehron bir necha oy ichida uranni boyitishni qayta boshlashi mumkin”ligini bildirgan. AQSH prezidenti Donald Tramp esa Tehronning yadroviy dasturini “to‘liq va butunlay yo‘q qilganini” bir necha bor ta’kidlagan.
Izoh (0)