“Liverpul” jamoasi bosh murabbiyi Arne Slot, shuningdek, futbolchilar Darvin Nunyes hamda Muhammad Saloh kuni kecha YTH oqibatida vafot etgan Diogu Jotani xotirladi.
Jumladan, Arne Slot Jota bilan so‘nggi suhbatida uni Porutagilyaning Millatlar Ligasidagi g‘alabasi va to‘yi bilan tabriklaganini esladi.
“Nima deyman? Bunday paytda zarba va og‘riqqa chidab bo‘lmas ekan, kim nima deyishi mumkin? Qaniydi, qandaydir so‘z topib gapira olsam. Menda bor narsa, biz juda yaxshi ko‘rgan inson va futbolchi haqida gapirib berishim mumkin bo‘lgan voqealardir.
Mening dastlabki fikrlarim futbol menejeriniki emas, ular ota, o‘g‘il, aka-uka va amakilarniki deb qabul qiling. Diogu va Andre Silvalar oilasi tasavvur qilib bo‘lmas judolikka uchradilar”, deydi murabbiy.
Slot klub sifatida bu shunchaki shok bo‘lganini aytdi.
“Diogu nafaqat bizning futbolchimiz edi. U barchamiz uchun sevimli inson edi. U yaxshi jamoadosh, yaxshi hamkasb edi. U jamoamizga nima olib kelgani haqida ko‘p gapirishim mumkin, lekin Diogu o‘yinini tomosha qilgan har bir kishi buni biladi. Qattiq mehnat, istak, fidoyilik, sifat, gollar. “Liverpul” futbolchisi qanday bo‘lishi kerakligining mohiyati aks etardi.
Hamma ham ko‘rmagan jihatlar bor. Hech qachon mashhurlikka intilmagan, lekin baribir unga erishgan odam. Ikki kishiga emas, hammaga do‘st. U o‘z oilasi haqida qayg‘uradigan inson edi”, deydi Arne Slot.
Darvin Nunyes ham Jotaning fojiali vafoti munosabati bilan hamdardlik bildirdi.
“Men seni doim tabassuming bilan, maydonda va undan tashqaridagi yaxshi jamoadosh sifatida eslab qolaman. Dioguning oilasiga sabr tilayman. Ishonchim komilki, u doimo rafiqasi va bolalari bilan birga bo‘ladi”, degan Nunyes.
Muhammad Saloh gapirishga til ojiz ekanligini bildirdi.
“Kechagi kungacha tanaffusdan keyin “Liverpul”ga qaytishdan qo‘rqaman deb o‘ylamagandim. Jamoadoshlar kelib-ketadi, lekin bunday emas. Qaytganimizda Diogu u yerda bo‘lmasligiga ko‘nikish nihoyatda qiyin bo‘ladi.
Rafiqasi, bolalari va albatta farzandlaridan ayrilgan ota-onasi bilan doim birgaman. Diogu va uning ukasi Andrega yaqin bo‘lganlarning barchasi qo‘llab-quvvatlashga muhtoj. Ularni hech qachon unutishmaydi”, deydi misrlik futbolchi.
Eslatib o‘tamiz, Jota 2025-yil 3-iyul oqshomida avtohalokatga uchrab, vafot etgan. Ushbu yo‘l-transport hodisasi natijasida uning ukasi Andre Silva ham hayotdan ko‘z yumgan.
Izoh (0)