Angliyaning “Manchester Yunayted” klubi o‘z futbolchisi — 27 yoshli hujumchi Markus Reshfordni sotish bo‘yicha “Real Madrid”ga rasmiy taklif yubordi. Bu haqda Defensa Central nashri xabar bermoqda.
Manbaning yozishicha, “qizil iblislar” ushbu transferdan 40 million yevro daromad olishni mo‘ljallamoqda. Ayni paytda “Real Madrid” yangi hujumchi izlayotgani ma’lum, biroq Reshfordning o‘yin uslubi “qirollik klubi” taktikasiga to‘liq mos kelmaydi.
Xabarda qayd etilishicha, madridliklar jamoani Xoseluga o‘xshash uslubdagi markaziy hujumchi bilan kuchaytirishni istamoqda. Reshford esa asosan qanotlarda to‘p suradi hamda zaxiradan maydonga tushib, o‘yinning taqdirini o‘zgartirib yuboradigan futbolchi sifatida qaralmayapti.
Shuningdek, “Manchester Yunayted”ning yangi bosh murabbiyi Ruben Amorim Reshfordni kelasi mavsum rejalariga kiritmagan. Shu bois u transferga qo‘yilgan futbolchilar ro‘yxatiga kiritilgan.
Markus Reshfordga “Barselona” ham qiziqish bildirgan. Biroq kataloniyaliklar 40 million yevrolik narxni yuqori deb baholamoqda. Agar tomonlar narx borasida kelishuvga erishsa, “Barselona” Reshfordni safga qo‘shib olishi mumkin. Biroq klub uni asosan zaxira varianti sifatida ko‘rmoqda. Agar “Barselona” “Liverpul” futbolchisi Luis Diasni qo‘lga kirita olmasa, Reshford bilan shartnoma imzolashga urinib ko‘radi.
Izoh (0)