“Liverpul” egasi bo‘lgan Fenway Sports Group La Liga klubini sotib olishni rejalashtirmoqda

Amerikaning yirik sport kompaniyasi Fenway Sports Group (FSG) Ispaniyaning “Xetafe” klubini xarid qilish bo‘yicha muzokaralar olib bormoqda. Bu haqda Marca nashri xabar berdi.

Manbaga ko‘ra, FSG kompaniyasi Red Bull va boshqa yirik tashkilotlar kabi ko‘pklubli (multi-klub) tizim yaratish niyatida. Kompaniya hozirda bir nechta sport jamoalariga egalik qiladi: beysboldagi “Boston Red Soks”, xokkeydagi “Pittsburg Pengvinz” va NASCAR musobaqasidagi “RFK Rasing” shular jumlasidandir.

Endilikda FSG bor e’tiborini Yevropa futboliga qaratmoqchi. “Xetafe” esa bu borada ular uchun jozibador variantga aylangan. Klubning afzalliklari sifatida uning Madrid yaqinidagi geografik joylashuvi, yosh iste’dodlarni topish va sotish imkoniyati, shuningdek, yangi stadion qurilishi kabi omillar ko‘rsatilmoqda. Ma’lumotlarga ko‘ra, stadion qurilishi allaqachon boshlangan.

“Xetafe” prezidenti Anxel Torres avvalroq shuni ma’lum qilganki, klub yangi stadionga ko‘chganidan so‘ng, u rahbarlik lavozimini tark etadi.

Shuningdek, FSG ilgari “Malaga” klubini xarid qilish imkoniyatini ham ko‘rib chiqqan, biroq bu reja amalga oshmagan.