Mashhur sport portali TNT Sports 2025-yilgi “Oltin to‘p” mukofotiga asosiy nomzodlar reytingini e’lon qildi. So‘nggi oylar ichida ilk bor reyting yetakchisi o‘zgardi. Bu safar ro‘yxatning yuqori pog‘onasida “Pari Sen-Jermen” (“PSJ”) klubi va Portugaliya terma jamoasining yarim himoyachisi Vitinya joy oldi.
Vitinya 2024/25-yilgi mavsumda “PSJ” bilan “kvadrupl” (to‘rt karra chempionlik) – Liga 1, Fransiya kubogi, Liga Kubogi va UEFA Chempionlar Ligasi g‘alabalarini qo‘lga kiritgan. Shuningdek, u Portugaliya terma jamoasi bilan UEFA Millatlar Ligasini ham yutdi. Bu muvaffaqiyatlar uni mukofot uchun asosiy da’vogarga aylantirdi.
Ikkinchi o‘rinni yana bir “PSJ” vakili, fransiyalik futbolchi Usmon Dembele egallagan. Kuchli uchlikka “Barselona” va Ispaniya terma jamoasining iqtidorli hujumchisi Lamin Yamal yakun yasadi.
To‘liq reyting (TNT Sports talqini bo‘yicha):
- Vitinya (“PSJ”, Portugaliya)
- Usmon Dembele (“PSJ”, Fransiya)
- Lamin Yamal (“Barselona”, Ispaniya)
- Rafinya Dias (“Barselona”, Braziliya)
- Nunu Mendesh (“PSJ”, Portugaliya)
- Ashraf Hakimi (“PSJ”, Marokash)
- Muhammad Saloh (“Liverpul”, Misr)
- Janluiji Donnarumma (“PSJ”, Italiya)
- Kilian Mbappe (“Real Madrid”, Fransiya)
- Xvicha Kvaratsxeliya (“PSJ”, Gruziya).
Eslatib o‘tamiz, 2024-yilgi “Oltin to‘p” mukofotini “Manchester Siti” klubi va Ispaniya terma jamoasining markaziy yarim himoyachisi Rodri qo‘lga kiritgan edi.
Izoh (0)