Ronaldudan penaltini tortib olgan, Kasilyas bilan mojaroda Mourinyoni qo‘llab-quvvatlagan va maydondagi “o‘ynovchi murabbiy” bo‘lgan Xabi Alonso haqida

2009-yilning yozi — “Real” tarixida burilish nuqtaga aylandi. Florentino Peres ikkinchi marta prezidentlik postini egalladi va bir necha hafta ichida madridliklar jarangdor transferlar bilan dunyoni larzaga soldi: Krishtianu Ronaldu, Kaka, Karim Benzema — bu uchala futbolchining narxi 200 million yevro edi.

Yulduzlar xit-paradida yana bir transfer bor ediki, uning ismi media nuqtayi nazaridan unchalik ham yorqin emas, lekin yangi buyuk jamoaning qurilishida muhim ahamiyat kasb etardi. Bu “Liverpul”dan 35 mln yevro evaziga sotib olingan Xabi Alonso edi.

Yangi galaktikos markazining qurilishidagi poydevor.

Alonso “Liverpul”dan Benites bilan kelishmovchilik tufayli ketgan

2000-yillarning o‘rtalarida Xabi nafaqat “Liverpul”ning eng muhim o‘yinchilaridan biri, balki muxlislar yoqimtoyi — elegant, aqlli, xotirjam bo‘lgan markaz dirijyori edi.

Lekin 2008-yil Rafael Benites jamoani qayta qurishni jiddiy o‘ylaydi va “Aston Villa” tayanch yarim himoyachisi Garet Barrini o‘zining taktik o‘ylanmalariga ko‘proq to‘g‘ri keladi deb hisoblaydi. U Alonsoni Barriga o‘zgartirish fikrini faol tarzda ilgari suradi va hatto ispaniyalikni sotishga ham urinadi. Baxtga qarshi Barrining transferi amalga oshmaydi va Alonso jamoada qoladi. Benites va uning orasidagi ishonch poymol bo‘ladi.

“Men tushunmayapman, nimaga o‘yinchi va murabbiy o‘rtasida ziddiyat bor, lekin futbolchi ajoyib formada — buni to‘g‘rilash va murosaga kelishni iloji bormi?” hayratga tushadi Jeymi Karrager.

2011-yil El Pais’ga bergan intervyusida Alonso ochiq oydin fikrini aytadi: “Meni avvalgidek qadrlashmayotganini his qilgandim. Agar seni boshqa o‘yinchi bilan almashtirishga tayyor bo‘lishsa — sen ular uchun endi muhim emassan. Bu noprofessional emas, balki emotsional zarba edi”.

2008-yilning martida Alonso Benitesdan o‘zining birinchi farzandi tug‘ilishi munosabati bilan xotinining yonida bo‘lish uchun “Inter”ga qarshi (YCHL 1/8 bosqichidagi javob o‘yini) o‘yinga bormaslikni so‘raydi. Benites esa Alonsodan jamoaga Milandagi o‘yin uchun qo‘shilishni talab qiladi.

Bu haqida Xabi bir necha yillardan keyin to‘xtalib o‘tadi: “Men murabbiyga bunaqa vaziyatda jamoa bilan bora olmasligimni aytdim. Agar farzandim tug‘ilib hammasi joyida bo‘lganida men Milanga borar edim. O‘sha payt men samolyotga chiqib, o‘yin kuni jamoa bilan bo‘lar edim. Lekin u kutishni istamagani uchun rozi bo‘lmadi”.

Natijada Alonso Angliyada qoldi, “Liverpul” esa 1:0 hisobida, umumiy 3:0 hisobida g‘alaba qozonib chorak finalga yo‘l oldi.

2008-yilning yozida “Yuventus” va “Arsenal” Xabini sotib olishga urinishdi, lekin “Liverpul” bilan transfer summasini kelisha olishmadi. “Arsenal” ispan uchun 20 mln yevro berishga tayyor edi. Bu summa o‘sha vaqtdagi Arsen Venger transferlari uchun ma’qul kelardi.

Bir yil oldin Benites Karrager bilan podkastda o‘sha tarix haqida qiziqarli detalni ochiqladi: “2008-yilning yozida Alonsoning “Arsenal” bilan kelishuvi bor edi. YCHL saralash o‘yinidan oldin senga (Karragerga) va Jerrardga Xabi Chempionlar Ligasida o‘ynashni xohlamayotganini aytgandim. Lekin u maydonga chiqishga majbur edi. O‘yinga tayyorgarlik vaqtida sizlar unga: “Bechora Xabi” deb aytdingiz. Yo‘q, u bechora emas. U o‘sha vaqtda biz bilan edi”.

Alonso yana bir mavsum jamoada qoldi va uni ajoyib tarzda o‘tkazdi: doimiy asosiyda tushdi va yettita golli uzatmani amalga oshirdi, jamoaning Chempionlar Ligasining chorak finaliga chiqishiga yordam berdi va aynan “Real”ga imkoniyatni boy berdi. Lekin u tushunardi — endi oldinga yurish kerak: “Men “Enfild”da juda ajoyib besh yilni o‘tkazdim, lekin bir kuni Ispaniyaga qaytish mening rejalarimda har doim bor edi. “Real”ga o‘tish faoliyatim va bundan-da yaxshi bo‘lishim uchun foydali bo‘lishini tushunardim”.

2009-yilning yoziga kelib hammasi aniq edi, Alonsoning “Liverpul”da qola olmasligi, Benites bilan uzoq cho‘zilgan munosabatlari va Ispaniyaga qaytish xohishi hech qanday boshqa variantga o‘rin qoldirmadi.

Peres faqatgina Alonsoni xohlardi — boshqa variant yo‘q edi

Florentino 2009-yilning iyunida “Real” prezidentlik postiga yana qaytadi. Albatta, ulkan rejalar bilan. Birinchi haftalarning o‘zida Kaka va Krishtianu Ronaldular bilan kelishuvga erishadi, iyulda esa “Lion” bilan Karim Benzema transferini hal qiladi.

Kuchli hujumchilarni sotib olishdan tashqari Florentino himoya va hujumni ulab turadigan, tempni nazorat qiladigan va o‘yinni chuqur ichkaridan qura oladigan asosiy markaz o‘yinchisini qidirayotgan edi. Marca nashrining yozishicha, prezident may oyidayoq Xabi Alonsoni tayanch zonasining asosiy nomzod sifatida tanlagan edi. Ispan ro‘yxatdagi yagona alternativ tanlovsiz o‘yinchi edi: Kakani David Silva bilan almashtirishi mumkin edi, Ronalduni esa — Frank Riberi bilan.

Alonso bilan prezidentning boshqacha yondashuvi bor edi — Xabi yoki hech kim. 2021-yil Cadena SER radiosiga bergan intervyusida 2009-yil “Real”ning sport direktori bo‘lgan Xorxe Valdano bu ma’lumotni tasdiqlaydi: “Matbuotda juda ko‘plab ismlari yangrardi, De Rossi va boshqa tayanch yarim himoyachilar, lekin biz faqat va faqat Alonsoni xohlar edik. Gazetalardagi bunaqa shovqinlar biz uchun ma’qul kelardi, chunki bu shovqinlar “Liverpul”ning riskni to‘g‘ri baholashiga turtki bo‘ldi”.

Iyul oyida “Real” “Liverpul” bilan rasmiy muzokaralarni boshladi, lekin jarayon qiyin kechdi. Ispanlar dastlab 25-27 mln yevro atrofidagi shartnoma taklif qildi, “Liverpul” esa 47 mln talab qildi — iyul o‘rtalariga kelib, kelishuv jar yoqasida edi. “Alonsoning transferi hozirda haqiqatdan ancha uzoq”, — tasdiqlagandi Valdano.

Aynan o‘sha paytda “Real” va o‘yinchi tomonidan bosim kuchaydi: Ular “Liverpul”ning kelishuvni berk ko‘chaga olib kirib, hech qanday so‘rovni pasaytirmasliklarini tushunishardi.

Valdano bu muzokaralar shunchaki inglizlarning strategiyasi va hammasi nazorat ostida ekanligini tushuntirib, Xabini tinchlantirdi. Alonso kutishni xohlamasdi — avgust yaqinlashar va yangi mavsum start olishiga oz qolgandi. O‘shanda Xabi Benitesga mavsumoldi Osiyo turnesiga borishni xohlamasligini xabar berdi. “Liverpul” tushundi va talab qilinadigan summani 47 dan 35 mln yevroga tushirdi.

Peresni bu qoniqtirdi va 2009-yilning 4-avgustida Xabi rasmiy ravishda “Real” tarkibiga qo‘shildi.

Alonso “Real”da darhol yetakchiga aylandi va Ronaldudan bemalol penaltilarni tortib olardi

“Madrid” uchun 2009/10-mavsum katta kutilmalar bilan boshlandi. Peres yaqindagina treblga erishgan Pep Gvardiolaning “Barselona”siga jang taklif qilishi kerak edi.

Jamoaning yangi bosh murabbiyi Manuel Pellegrini o‘yinni Alonso atrofida qurishni rejalashtirdi: “Unda o‘rganish bo‘yicha katta qobiliyat bor. Jamoa bilan birinchi haftaning o‘zidayoq kim qayerga yugurishi, kim nimani o‘ylashi va hatto kim qachon charchashini bilardi”.

Alonso jamoa bazasidan uncha uzoq bo‘lmagan joydan uy xarid qiladi va mashg‘ulotlarga yarim soat oldin kelib, raqiblarning video lavhalarini ko‘rardi va o‘tgan o‘yinlarni analiz qilardi.

U maydon markazida birdaniga asosiy joy egallaydi. Xabi shunchaki jamoaga moslashib ketmadi, balki jamoaning dirijyori bo‘lib, hujum va himoya o‘rtasidagi balans hamda ritmni ushlab turadigan o‘yinchi bo‘ldi.

Alonso markazdagi o‘yinni buzadigan va vaziyat yarata oladigan yagona futbolchi edi. U sxema nuqtai nazaridan Lassana Diarra yoki Fernando Gago bilan ko‘proq birga o‘ynar edi. Tarkib joylashishi 4-4-2 va 4-2-2-2 orasida bo‘lardi va ular bilan birga maydon markazida Esteban Granero va Rafael van der Vart birga harakat qilardi. Lekin aynan Xabi orqali butun hujum bosqichi borar edi — u to‘pning himoyachilar orqali harakatiga va yon chiziqlarning o‘zgarishiga javobgar edi.

Xabi deyarli butun mavsum davomida o‘zgarmas futbolchi bo‘ldi: hamma turnirlarda 41 o‘yin (La Ligada — 35 ta), uzatmalar aniqligi esa deyarli 90% ni tashkil qilardi.

Alonsoning liderlik xususiyatlari 2010-yilning fevral oyidagi “Villareal”ga qarshi o‘yinda yorqin namoyon bo‘ldi: “Madrid” 5:2 hisobida oldinda edi va 86-daqiqada u penalti ishlab oladi. To‘pni bitta gol urgan va dubl qilishni xohlagan Krishtianu oladi, lekin Alonso bilan qisqa suhbatdan keyin ispaniyalikka to‘pni qoldiradi.

Keyinchalik ma’lum bo‘lishicha, Ronaldu to‘pni berishni istamagan. Ispan matbuoti esa futbolchilarning suhbatini ochiqlagan:

— Krish, menga to‘pni ber. Men hali gol urganim yo‘q.

— Keyingi safar, va’da beraman.

— To‘pni menga ber va nariroq tur.

Krishtianuga baskning qat’iyati yoqmagan — jamoa bilan birga golni nishonlamagan va jamoadoshini debyut goli bilan tabriklamagan. The Guardian nashri yozishicha, Ronaldu faqatgina Alonsoga nimanidir noto‘g‘ri qilgani uchun gapirmagan va to‘g‘irlamagan yagona futbolchi. Krishtianu esa o‘z navbatida undagi avtoritet va kiyinish xonasidagi liderlardan biri ekanligini tan oladi.

Xabi intervyularining birida Ronaldu bilan ularni do‘st deb bo‘lmasligini, lekin ziddiyat ham yo‘qligini aytadi: “Albatta, biz do‘st emasmiz. Biz maydon tashqarisida birga vaqt o‘tkazmaymiz. Krishtianu bilan oramizdagi munosabatni qat’iy professionallar kabi deyishim mumkin. U o‘z ishini ajoyib tarzda amalga oshiradi va jamoaga katta yordam beradi. Uning xususiyatlari betakror, u tufayli biz maydonda ko‘proq g‘alaba qozonamiz, u dunyoning eng zo‘rlaridan biri”.

Alonsoning Ispaniyadagi birinchi mavsumi titullarsiz yakuniga yetdi, lekin hammasi endi boshlangan edi — Peres Pellegrinini iste’foga chiqardi va yaqindagina “Inter” bilan Chempionlar Ligasini yutgan Joze Mourinyo bilan shartnoma imzoladi.

Mourinyo Alonsoda o‘ynovchi murabbiyni ko‘rardi va taktik savollarni u bilan muhokama qilardi

Mourinyoning kelishi “Real”dagi taktik o‘zgarishlarga sabab bo‘ldi: portugaliyalik murabbiy 4-2-3-1 sxemasini ilgari surib, Alonsoning endigina jamoaga kelib qo‘shilgan Sami Xedira bilan bir chiziqda o‘ynashini istadi. Ularning juftligi bu — aql va jismoniy balans edi: Xedira to‘pni olib qo‘yishni, Alonso esa tempni nazorat qilib, o‘yin borishini ta‘minlar edi.

Xabi Joze bilan bo‘lgan birinchi haftalar qiyin bo‘lganini tan oldi: “Mourinyo jamoaning har bir a’zosidan nimani xohlayotganini birdan tushunmadim, lekin har bir yangi mashg‘ulotdan va har bir yangi o‘yindan keyin yanada ko‘proq tushuna boshladim — biz to‘g‘ri yo‘nalishdamiz”.

Alonso Mourinyo uchun markazdagi asosiy figura edi — Alonso “Real”dagi ikkinchi mavsumida barcha musobaqalarda 51 marta maydonga tushadi. 2010/11-mavsumda “Madrid” nihoyat Pepning “Barsa”siga to‘liq jang taklif qiladi: Ispaniya Kubogi doirasidagi final bahsida kataloniyaliklarni mag‘lub etib, navbatdagi treblni rasmiylashtirishiga yo‘l qo‘ymadi.

Ungacha esa 2010-yil noyabrida “Barselona” Mourinyoning “Real”ini “Kamp Nou”da 5:0 hisobida yer tishlatadi. Alonsoning faoliyatidagi eng yomon kecha: “20-daqiqadayoq men maydondan chiqib ketishni o‘ylayotgan edim. Bu eng sharmandali mag‘lubiyat edi. Lekin aynan o‘sha mag‘lubiyat bizga ko‘p narsani o‘rgatdi. Biz o‘sha kechadan keyin ancha kuchaydik”.

Alonso faoliyatini tugatgandan keying intervyularida jamoaning asosiy muammosi bu Messining qanday to‘xtatishni bilmaganliklarida ekanligini aytadi: “Xavi orqaroqda o‘ynardi, men uning ortidan bordim. Messi esa mening orqamdagi ochiq maydondan joy egalladi va Ramosni o‘z liniyasini tashlab chiqishga majbur qildi. Shuning uchun Leo o‘ziga kerakli vaziyatlarda to‘pni egallar va katta bo‘shliqlardan kesib beradigan uzatmalar orqali foydalanardi”.

Bu taktik muammoni hal qilish uchun Mourinyo Alonso va Ramos bilan birgalikda reja tuzishni boshladi.The Guardian nashrining xabariga ko‘ra, Joze hech qachon uning so‘zlarini bo‘lmaydigan va kiyinish xonasida taktik maslahatlarini diqqat bilan eshitadigan yagona futbolchi Xabi bo‘lgan.

Mourinyo esa o‘z navbatida buni 2011-yildagi “Tottenhem”ga qarshi uchrashuv oldidan matbuot anjumanida tasdiqladi: “Xabi murabbiy kabi fikrlaydi. Men o‘rindiqda turib o‘ylagan narsalarni u maydonda qila oladi. U hamma narsani biladi”.

Klasikoda ketma-ket to‘rt marta mag‘lubiyatdan so‘ng 2011-yilning aprelida Alonso Mourinyo uchun Messi muammosini yechishda yordam beradi.

“Biz Ramosning o‘z chizig‘ini tashlab Leoning yoniga chiqishiga yo‘l qo‘ymasligimiz kerakligini tushundik — men Messini ta’qib qilaman, Xavi esa maydon markazida to‘p bilan bir o‘zi qoldi, — eslaydi Alonso. — Biz boshqacha yo‘l tutdik – to‘pni oldingi chiziqdan olib qo‘yish o‘rniga yon chiziqlardagi bo‘shliqlarga va Messining erkinligiga yo‘l qo‘ymadik. Bu bizga Kubok finalida g‘alaba qozonishimizga yordam berdi, bundan tashqari keyingi qarama-qarshiliklarda taktik jihatdan tenglashishimizga ham turtki bo‘ldi”.

2010/11-yilgi mavsumda Mourinyo, Alonso va Ramos bilan bog‘liq yana bir voqea bor edi.

2010-yilning noyabrida Chempionlar Ligasi doirasida “Ayaks”ga qarshi uchrashuvida Xabi va Serxio pley-offdan oldin sariq kartochkalarini yangilab olish uchun ataylab qizil kartochka olishadi. “Real” 4:0 hisobida g‘alaba qozonayotgan vaqtda ikkalasi ham vaqtni cho‘zishni boshlaydi. Dastlab Alonso jarima zarbasini uzoq vaqt amalga oshirishni cho‘zgan bo‘lsa, so‘ngra Ramos darvozadan erkin zarbada vaqt cho‘zadi. Hakam ularga ikkinchi sariqni ko‘rsatadi va ular hatto jilmaygancha maydonni tark etadi. Hammasi shunchalik ochiq oydin ediki, birdaniga UEFA tomonidan shubha ostiga olinadi. Tekshiruvlar boshlanadi.

Tekshiruvlar shuni ko‘rsatadiki, haqiqatan ham Mourinyo Dudek va Kasilyas orqali Alonso va Ramosga ikkinchi sariq kartochkani olish bo‘yicha ko‘rsatma bergan ekan. Bu holat ularga guruh bosqichidagi hech nimani hal qilmaydigan oxirgi o‘yinni o‘tkazib yuborib, nimchorak finalga kartochkalaridan forig‘ bo‘lgan holda borishini ta’minlar edi. UEFA to‘rt futbolchiga jarima solib, Mourinyoni bitta o‘yinga chetlatdi. Natijada “Real” Chempionlar Ligasi yarim finaligacha bordi va yana “Barselona”ga mag‘lub bo‘ldi.

Keyingi mavsumda “Real” “Barsa”ning gegemoniyasini to‘xtata oldi — buning uchun ularga chempionatda rekord darajadagi 100 ochko, rekord darajadagi 121 gol va 2007-yildan beri birinchi marta “Kamp Nou”da g‘alaba qozonishiga to‘g‘ri keldi. “Madrid”ning o‘sha versiyasi Mourinyo davridagi eng zo‘ri edi, hattoki YCHL yarim finalida penaltilar seriyasida “Bavariya”ga mag‘lubiyatga uchragan bo‘lsa ham. O‘sha o‘yinda “Real” tarkibidan faqatgina Alonso 11 metrlik nuqtadan gol ura olgan edi.

“Biz o‘sha yili eng yuqori formada edik. Har bir o‘yinni 20 yoki 30 daqiqada yakunlashimizni his qilib boshlar edik. Ko‘p o‘yinlarda shunday ham bo‘ldi — biz 2-3 ta gol ursak, raqiblar hatto qarshilik ko‘rsatmas edi. Agar biz Krishtianu, Benzema, O‘zil va di Mariyaga to‘pni uzatsak, gol haqida o‘ylamasak ham bo‘lar edi”, — deb eslaydi Alonso 2011/12-yilgi mavsum haqida.

Mourinyo “Real”ning kiyim almashtirish xonasini “buzib tashladi”, Alonso esa uni qo‘llab-quvvatladi

2011/12-yilgi mavsum chempionlari 2012/13-yilgi mavsumni og‘ir va depressiv boshladi.

Jamoa “Barselona” ustidan Ispaniya Superkubogida g‘alaba qozongan bo‘lsa ham, chempionatdagi ishlari juda yomon edi. Sentyabrning o‘rtalariga kelib “Madrid” “Barsa”dan 7 ochkoga ortda qolayotgan edi. Bu o‘sha paytda deyarli chempionlik poygasini o‘ldirar edi.

Natijalarning pasayishi kiyim almashtirish xonasidagi asabiylikni kuchaytirar edi va natijada Mourinyo va Kasilyasning janjaliga ham sababchi bo‘ldi.

Joze “Barsa”ga qarshi o‘yinda hammaning birlashishini va “qamal ostidagi qal’a” rejasi ostida ish tutishni xohlar edi. Lekin Kasilyas Ispaniya terma jamoasi sardori sifatida Xavi va Puyolga aloqaga chiqib “Real” va “Barsa” o‘yinchilari orasidagi keskinlikni kamaytirish haqida suhbatlashgan. Mourinyo uchun bu sotqinlik bilan teng edi: uning fikricha, Iker terma jamoani klubdan ustun qo‘ygan va jamoadagi intizomni buzgan.

Mourinyo Kasilyasning liderlik xususiyatlariga shubha bilan qarashni boshlaganidan boshlab vaziyat yanada og‘irlashdi. U Ikerda judayam ko‘ngilchan, matbuotga judayam yaqin (ayniqsa Mourinyoni tanqid qiladigan jurnalistlarga), ehtiyotkor sardorni ko‘rardi.

Ularning qarama-qarshiligidan so‘ng jamoa ikki lagerga bo‘linib qoldi — murabbiyni qo‘llab-quvvatlaydiganlar va jamoa sardori tarafda turganlar. Ikerni ko‘p kishi qo‘llab-quvvatlardi, Alonso esa hech kimga bildirmasa ham Mourinyo taraf edi.

El Pais yozishicha, Alonso Jozening professionalizmi va futbolga bo‘lgan qarashi uchun hurmat qilar edi, Kasilyasni esa faqat jamoadosh sifatida ko‘rar, lekin unchalik ham iliq munosabatlar yo‘q edi — ular bir-birini hurmat qilishar, lekin yaqin do‘st bo‘lib ketishmagandi. Iker va Joze o‘rtasidagi ziddiyat ortib borganda, Xabi Ramos va boshqa ispaniyaliklar kabi Kasilyasning tarafida bo‘lmadi. Undan tashqari Xabi Ikerning shaxsiy munosabatlarga bog‘lanib qolgan deb hisoblardi. Alonso esa jamoaning maqsadlarini hamma narsadan ustun qo‘yardi.

Shu o‘rinda Xabi murabbiyni bu jihatda o‘rnak sifatida ko‘radi: “Men Jozedan haqiqiy lider bo‘lishni va jamoaning bir maqsad uchun jang qilishi kerakligini o‘rgandim. U har doim g‘alaba qozonishni xohlaydi”.

2012/13-yilgi mavsum oxirida Mourinyo “Real”ni tark etadi, uning o‘rniga kelgan Karlo Anchelotti esa jamoadagi keskinlikni tezda bartaraf etadi.

Alonso “Real” bilan shartnoma uzaytirganidan yarim yil o‘tib, jamoani tark etadi. Peres uni shaxsiy iltimosdan keyin qo‘yib yubordi

2013/14-yilgi mavsum Xabi uchun “Real”dagi oxirgi mavsum bo‘ldi, hattoki 2013-yil bahoridan shartnoma uzaytirish bo‘yicha muzokaralari bo‘lsa ham.

Anchelotti qo‘l ostida ham Alonsoning darajasi o‘zgarmadi — u yarim himoyadagi asosiy o‘yinchi edi, sxemaning 4-2-3-1 dan 4-3-3 ga o‘tgani esa Xabi uchun ko‘proq kuch tejashiga olib keldi. Karlo Modrich va di Mariyaga sakkizlik uchun imkon berdi, ular maydonda katta ish qilib, ispandan katta yukni oldi.

Yangi shartnomaga rozi bo‘lgandan so‘ng esa bu uzoqqa cho‘zilmadi. Alonso va “Real”ning maosh bo‘yicha muammosi yo‘q edi, hammasi Xabining 32 yoshiga borib taqaldi va “Madrid” uni bir yilga saqlab qolmoqchi edi. Alonso esa o‘z navbatida oilasi bilan kelajagini yaxshiroq qurish uchun 2 yillik shartnoma xohlar edi.

“Real” bu shartlarga ko‘ndi va 2014-yilning yanvarida Alonso bilan bitimni 2016-yilga qadar uzaytirdi. O‘yinchi va Anchelotti o‘rtasidagi munosabatlar judayam yaxshi edi: “Karlo — jamoani boshqarish bo‘yicha yuqori darajali murabbiy. Men undan har qanday holatda ham xoh u yaxshi, xoh u yomon vaziyat bo‘lsin xotirjamlikni saqlashni o‘rgandim. Hissiyotlarga berilmaslik judayam muhim”.

Jamoa mavsumni Ispaniya Kubogi hamda uzoq kutilgan Chempionlar Ligasi kubogini qo‘lga kiritib, yakunladi. Xabi “Atletiko”ga qarshi final uchrashuvini sariq kartochkalari ko‘payib ketganligi sababli o‘tkazib yuboradi, lekin Garet Beylning qo‘shimcha vaqtda urgan golidan so‘ng uning maydonga tribunadan yugurib jamoa bilan golni nishonlagani haligacha eslanadi.

Yoz Alonso haqidagi jarangdor xabarlarsiz o‘tdi. Lekin hammasi avgust oxiriga borib kutilmaganda o‘zgardi: Xabi Peresga kutilmagan uchrashuvni tashkil qilib, unga ketishi haqida xabar berdi.

Sabab esa Toni Kroosdan ayrilgan “Bavariya” (aynan “Real” uni qo‘lga kiritgandi) murabbiyi Gvardiolaning qo‘ng‘irog‘i edi va unga chuqur o‘ynaydigan pleymeyker kerak edi. Myunxen klubi Alonsoga 3 yillik shartnoma taklif qildi va bu Alonsoga yoqib tushdi.

Jamoa transferlar oynasidagi ishlarini yakunlagan bir paytda jamoa liderining bunday so‘rovi Peresga yoqmadi va asosiy tayanch yarim himoyachining mavsum yonib turgan paytda ketgani jamoa uchun yaxshigina zarba bo‘ldi. Lekin “Real” prezidenti Xabining jamoa uchun qilgan ishlari uchun minnatdorchilik sifatida uni qo‘yib yubordi.

Oradan 10 yil o‘tib, “Bayer” bosh murabbiyi Xabi Alonso “Bavariya” va “Liverpul” takliflarini rad etgan holda “Real Madrid” bosh murabbiylik lavozimiga keldi. Balki, 2014-yildagi Peresning qilgan ishi Xabining boshqa jamoalarni rad etganiga sabab bo‘lgan bo‘lishi mumkin.

Alonso “Real” futbolchisi sifatida Klublar o‘rtasidagi Jahon Chempionatida tashqari hamma narsani yutgan va ramziy ma’noda aynan shu turnir bilan “Madrid”dagi murabbiylik safarini boshladi. Ilk o‘yin madridliklar uchun muvaffaqiyatsiz o‘tgan bo‘lsa-da (jamoa guruh bosqichidagi ilk o‘yinini “Al-Hilol”ga qarshi o‘tkazdi va 1:1 hisobida durang o‘ynadi), turnirning asosiy favoritlaridan biri hisoblanadi.