“Barselona” yozgi transfer oynasida bir qancha futbolchilarni olib kelish haqida o‘ylamoqda. Mundo Deportivo nashrining xabariga ko‘ra, klub jamoani kuchaytirishi mumkin bo‘lgan uch nafar asosiy nomzodni aniqlab, ro‘yxat tuzib bo‘lgan.
Ro‘yxatning birinchi pog‘onasidan “Liverpul” futbolchisi Luis Dias joy olgan. 28 yoshli kolumbiyalik futbolchi mersisayliklar bilan hali ikki yillik shartnomaga ega, biroq “Barselona” ingliz klubi bilan narx borasida kelishuvga erishib, uni o‘z safga qo‘shmoqchi.
Ikkinchi nomzod — “Atletik Bilbao”ning 22 yoshli hujumchisi Niko Uilyams. Bask klubi futbolchi uchun kamida 60 million yevro talab qilmoqda va aynan shu narx kataloniyaliklar uchun asosiy to‘siq bo‘lib turibdi.
Zaxira variant sifatida “Manchester Yunayted” hujumchisi Markus Reshford nomzodi ko‘rib chiqilmoqda. “Barselona” uni dastlab ijaraga olib, keyinchalik to‘liq xarid qilish huquqi bilan tarkibga jalb etishni rejalashtirgan.
Klubning sport direktori Deko futbolchilarga shunday murojaat qilgan: “Agar siz Kataloniyaga kelishni istasangiz, bu jarayonni yengillashtiring va ayniqsa, maosh masalasida murosaga tayyor bo‘ling.” Uning ta’kidlashicha, kimki ko‘proq tashabbus ko‘rsatsa, aynan o‘sha “Barselona” futbolchisiga aylanish imkoniyatiga ega bo‘ladi.
Izoh (0)