Jizzax viloyatida fuqaro D.B.ning murojaatiga asosan tezkor tadbir o‘tkazildi. Bu haqda Bosh prokuratura xabar berdi.
Maʼlum qilinishicha, fuqaro G.Q. Baxmal davlat o‘rmon xo‘jaligi “Ko‘kjar” o‘rmon bo‘limidan D.P.ga 2022-yildagi ijara shartnomasi orqali ekoturizmni rivojlantirish uchun 49 yil muddatga ijaraga berilgan 0,15 gektar va unga tutash bo‘lgan 0,25 gektar – jami 0,40 gektar yerni 19 ming dollarga uning nomiga rasmiylashtirib berishni aytgan.
U kelishilgan pullar hisobidan 245 mln so‘m olgan vaqtida ushlangan.
Mazkur holat yuzasidan jinoyat ishi qo‘zg‘atilib, tergov harakatlari olib borishga kirishilgan.
Yerni noqonuniy sotishga urinish bo‘yicha boshqa holatlar
Farg‘onada fuqaro 2,5 gektar yerni 650 ming dollarga sotishga kelishib, oldindan 100 ming dollarni olgan vaqtida ashyoviy dalillar bilan ushlangandi. Toshkent viloyati Ohangaron tumanida joylashgan va qishloq xo‘jaligiga mo‘ljallangan 32 gektar yerni 2,4 mln dollarga noqonuniy sotmoqchi bo‘lgan shaxs qo‘lga olingandi.
Surxondaryo viloyatida fuqaro qishloq xo‘jaligiga mo‘ljallangan 45 sotix yerni 60 ming dollarga sotishga kelishib, 56,7 ming dollar va 43 million so‘m olgan vaqtida qo‘lga tushgandi. Xorazm viloyatining Urganch tumanida fuqaro davlat zaxirasida bo‘lgan 24 sotix yer maydonini kadastr tizimida ishlovchi tanishlari orqali xaridor nomiga rasmiylashtirib berish evaziga 45 ming dollar va 13 million so‘m olgan vaqtida ushlangandi.
Izoh (0)