Isroil armiyasi 30-iyun kuni G‘azo shahridagi “Al-Baqa” kafesiga aviazarba berdi. Oqibatda 40 dan ortiq odam halok bo‘ldi. Bu haqda CNN xabar berdi.
Al-Shifo shifoxonasi direktori doktor Muhammad Abu Silmiya kechasi berilgan zarba oqibatida kamida 41 kishi halok bo‘lgani va 75 kishi jarohatlanganini aytgan. Isroil mudofaa kuchlari hodisa “o‘rganilayotganini” ma’lum qilgan. Zarba haqidagi savollarga yahudiy davlat mudofaasi shunday javob bergan:
“Isroil mudofaa kuchlari 30-iyun kuni G‘azo sektori shimolida HAMASning bir qancha terrorchilariga zarba berdi. Hujumdan oldin tepadan kuzatish orqali tinch aholiga zarar yetkazish xavfini kamaytirish choralari ko‘rilgan”.
“Al-Baqa” kafesi talabalar, jurnalistlar va onlayn ishchilar orasida mashhur. Chunki mazkur obyektda internetga ulanish imkoniyati mavjud. Kafe O‘rta Yer dengizi manzarasidan bahramand bo‘lib ishlash imkonini beradi.
Qurbonlarning aksariyati ayollar va bolalar, jumladan, internetga ulanish uchun kafega kelgan talabalar bo‘lgan. Shifoxonalarda jabrlanganlarni davolash uchun reanimatsiya o‘rinlari va anestetiklar yetishmayotgani aytilmoqda.
“Biz jarohatlanganlarni shifoxona polida davolayapmiz, chunki xonalar va koykalar yetishmayapti”, dedi shifoxona direktori.
Halok bo‘lganlar orasida jurnalist Ismoil Abu Xatab ham bo‘lgan. Shu tariqa 2023-yil oktyabr oyidan beri Isroilning G‘azodagi harbiy harakatlari oqibatida halok bo‘lgan jurnalistlar soni 228 nafarga yetgan.
Izoh (0)