Termiz shahrida 219 tup daraxt noqonuniy tarzda kesib tashlangani aniqlandi.
Ijtimoiy tarmoqlarda Termiz shahridagi archazor maydon yo‘q qilinayotgani haqida tarqalgan xabar yuzasidan Surxondaryo viloyati Ekologiya, atrof-muhitni muhofaza qilish va iqlim o‘zgarishi boshqarmasi, viloyat Prokuraturasi hamda viloyat Milliy gvardiya boshqarmasi xodimlari tomonidan o‘rganish ishlari olib borilgan.
Aniqlanishicha, mazkur hududda ko‘p qavatli turar-joy majmuasi qurilishi dastlab “Gigant Tosh Qurilish” MCHJ, keyinchalik esa ushbu obyektni meros qilib olgan Developments Rest MCHJ tomonidan amalga oshirilmoqda.
Qurilish uchun ajratilgan Termiz shahri “Do‘stlik” mahallasidagi yer maydonida 356 tup daraxt mavjud bo‘lib, ular 2025-yil mart oyida viloyat ekologiya boshqarmasi mutaxassislari tomonidan rasmiy xatlovdan o‘tkazilgan. Qurilish ishlari boshlanishidan avval jamoatchilik eshituvlari ham tashkil etilgan, mavjud daraxtlarni ko‘chirib o‘tkazish rejalashtirilgan edi. Mazkur MCHJ daraxtlarni ko‘chirib o‘tqazishga yuborgan so‘roviga viloyat Ekologiya boshqarmasi daraxt ko‘chirib o‘tqazish mavsumi emasligi sababli rad etilgan.
Biroq, belgilangan tartib va hujjatlarsiz, iyun oyida hududdagi 219 tup daraxt, jumladan eldor qarag‘ayi, vergin archasi, sharq biotasi, chinor va boshqa navlar noqonuniy tarzda kesib tashlangani aniqlangan.
Mazkur holat orqali “O‘simlik dunyosini muhofaza qilish va undan foydalanish to‘g‘risida”gi qonunning 21 (o‘simlik dunyosi o‘sadigan muhitni muhofaza qilish) va 37-moddalari (daraxt va butlarni kesish), shuningdek prezidentning 2021-yil 30-dekabrdagi PF-46-sonli farmoni talablari buzilgan. Unda davlat o‘rmon fondiga kirmaydigan daraxtlar va butalar qimmatbaho navlarining kesilishiga moratoriyning amal qilishi muddatsiz davrga uzaytirilgandi.
Qimmatbaho va kam qimmatli daraxtlarning noqonuniy kesilishi oqibatida o‘simlik dunyosiga juda katta miqdorda ekologik va iqtisodiy zarar yetkazilgan.
Hozirda holat bo‘yicha barcha tegishli hujjatlar viloyat prokuraturasiga huquqiy baho berish uchun taqdim etilgan.
Izoh (0)