Ayni vaqtda boshoqli don ekinlaridan bo‘shagan dalalarda somon poyalari va boshqa organik qoldiqlarni noqonuniy tarzda yoqib yuborish bilan bog‘liq ko‘plab holatlar kuzatilmoqda. Bu haqda “O‘zbekkosmos” agentligi xabar berdi.
Maʼlum qilinishicha, agentlikning Davlat kosmik monitoringi dasturi doirasida olib borilgan kuzatishlar natijasida iyun oyining bugungi kuniga qadar Respublikaning 10 ta viloyatida 639 ta mana shunday salbiy holat bo‘yicha 5350 gektar maydon noqonuniy tarzda yoqib yuborilgan. Kosmik tahlillar hududlar kesimida quyidagicha taqsimlangan:
- Toshkent viloyatida 27 ta holat 413,5 gektar;
- Sirdaryo viloyatida 32 ta holat 341,9 gektar;
- Jizzax viloyatida 7 ta holat 74,9 gektar;
- Buxoro viloyatida 16 ta holat 96,3 gektar;
- Andijon viloyatida 248 ta holat 2345,7 gektar;
- Farg‘ona viloyatida 13 ta holat 66,2 gektar;
- Namangan viloyatida 3 ta holat 36,7 gektar;
- Surxondaryo viloyatida 253 ta holat 1823 gektar;
- Xorazm viloyatida 31 ta holat 99,5 gektar;
- Qoraqalpog‘iston Respublikasida 9 ta holat 52 gektar.
Mazkur vaziyatlar bo‘yicha axborotlar Bosh prokuratura, Ekologiya vazirligi hamda boshqa tegishli idoralarga yuborilgan.
Maʼlumot uchun, boshoqli don ekinlaridan bo‘shagan maydonlarni tez va arzon yo‘l bilan yo‘q qilib yuborishga bo‘lgan harakat MJtKning tegishli moddasi bilan BHMning 10 barobarigacha (3 mln 750 ming so‘mgacha) jarima qo‘llanilishiga sabab bo‘ladi. Zarar miqdori katta bo‘lgan taqdirda jinoiy javobgarlikkacha olib borishi mumkin.
O‘zbekistonda 2024-yilning 6 oyida 23,3 ming gektarlik boshoqli don ekinlaridan bo‘shagan yer maydonlari yoqib yuborilgani haqida xabar berilgandi.
Izoh (0)