Toshkentda 2 tonnadan ortiq narkotik modda yoqib yuborildi

Toshkent shahrida 26-iyun – Xalqaro narkotik moddalarini suiisteʼmol qilish va ularning noqonuniy aylanishiga qarshi kurash kuniga bag‘ishlangan tadbir bo‘lib o‘tdi. Bu haqda “Daryo” muxbiri xabar berdi.

Narkotiklarni nazorat qilish milliy markazi tashabbusi bilan o‘tkazilgan tadbirda sohaga masʼul davlat organlari va jamoat tashkilotlari rahbarlari, BMT, Yevroittifoq vakillari ishtirok etdi.

Uchrashuvda giyohvandlik va narkojinoyatlarning ayanchli oqibatlari to‘g‘risida so‘z bordi. Muammoni jamoatchilikka yetkazish orqali aholi, ayniqsa, yoshlarda narkotiklarga qarshi immunitetni mustahkamlashga eʼtibor qaratildi.

“Hayotida xato qilgan insonlarni javobgarlikka tortish emas, balki ushbu qilmishlarini sodir etishga sabab bo‘lgan omillar bartaraf etish muhim. Bugun yoshlarda narkojinoyatlarga nisbatan toqatsiz munosabatni shaklantirish zarur”, dedi Narkotiklarni nazorat qilish milliy markazi direktori Ravshan Mamatov.

Tadbirda BMT vakili Salome Flores maʼruza qilib, dunyodagi narkovaziyat haqida gapirdi.

“Bugun jahonda 300 million kishi giyohvandlik vositalarini suiisteʼmol qilyapti. Qurbonlar soni esa bir yilda 600 ming nafardan oshmoqda”, dedi ekspert.

Muloqot davomida bu muammo ko‘plab mamlakatlar qatori O‘zbekistonni ham tashvishga solayotgani taʼkidlandi. Tahlillarga ko‘ra, so‘nggi 5 yilda respublikada narkojinoyatlar soni qariyb ikki baravarga ortgan.

Noqonuniy muomaladan olingan narkotiklar musodarasi esa 8,5 baravarga ko‘paygan. Shu bilan birga, sintetik giyohvandlik vositalari musodarasi 80 baravarga ko‘paygan.

Bu kabi ko‘rsatkichlar giyohvandlik muammosining nafaqat kengayib borayotgani, balki turli ijtimoiy qatlamlarga, jumladan, yoshlar va xotin-qizlar orasiga ham kirib borayotganini ko‘rsatmoqda.

Mutaxassislar fikricha, mazkur tendensiyaga qarshi kurashishda faqat huquqni muhofaza qiluvchi organlar emas, butun jamiyat – oila, taʼlim muassasalari, OAV va fuqarolik jamiyati institutlari birlashgan holda harakat qilishlari zarur.

Tadbirda o‘tgan bir yil mobaynida O‘zbekiston hududida huquqni muhofaza qilish organlari tomonidan noqonuniy muomaladan musodara qilingan giyohvandlik vositalari, psixotrop moddalar, kuchli taʼsir qiluvchi dori vositalari va prekursorlarning yo‘q qilish marosimi onlayn tarzda namoyish etildi.

Tadbirda Davlat xavfsizlik xizmati vakili so‘zga chiqib, marosimda jami 2 tonna 135 kilo giyohvandlik vositalari yo‘q qilinganini aytdi.

Qayd etilishicha, shundan 613 kilo kannabis, 415 kilo gashish, 395 kilosi marixuana, 202 kilo opiy, 153 kilo ko‘knor boshog‘i va somoni, 99 kilo geroin va boshqa narkotik moddalar yoqib yuborildi.

Tadbirda giyohvandlik vositalariga bo‘lgan tobelikdan davolanib chiqqan hamda narkojinoyat uchun jazoni o‘tab kelgan fuqarolarga so‘z berildi. Narkotiklar changalidan qutulib, yangi hayotni boshlagan ushbu shaxslar ramziy tugmani bosib, giyohvand moddalarni yo‘q qilish jarayoniga start berdi.

Tadbir doirasida “Biz hayotni tanlaymiz!” shiori ostida o‘tkazilgan videoroliklar hamda “Sanʼat giyohvandlikka qarshi” shiori ostida o‘tkazilgan rasmlar tanlovlari sovrindorlari taqdirlandi. Yosh rassomlar asarlari ko‘rgazmasi ham tashkil etildi.

Shu bilan birga, rejissyor Eljon Abbosov tomonidan tasvirga olingan “Mutlaq yovuzlik” nomli hujjatli filmning qisqa roligi (tizeri) mehmonlarga namoyish etildi. Filmning premyerasi yaqin kunlarda bo‘lib o‘tadi.