O‘zbekistondagi oilalarda kambag‘allik yuzaga kelishiga atrofdagi muhit kuchli taʼsir qilmoqda. Bu haqda 27-avgust kuni ko‘p o‘lchovli kambag‘allikka doir forum ochilishida Ijtimoiy himoya milliy agentligi direktori Mansurbek Olloyorov ma’lum qildi, deya xabar berdi “Daryo” muxbiri.
Mansurbek Olloyorovning taʼkidlashicha, kambag‘allik faqat pul yetishmovchiligi emas, balki ko‘p o‘lchovlidir.
“Aksariyat hollarda kambag‘allikka oila atrofidagi muhit taʼsir qilmoqda. Masalan, ayrim mahallalarda kambag‘al oilalar ulushi 30 foizdan yuqori. Demak, bu hududlarda kambag‘allikni samarali qisqartirish dasturlari aynan muhit omillari bilan ishlashga qaratilishi kerak. Shu sababli ko‘p o‘lchovli kambag‘allik indeksini mahalla va oilalarda aniqlashda qo‘llash bo‘yicha izlanishlar olib bormoqdamiz”, dedi agentlik rahbari.
-TVbWqrq0.jpg)
Mansurbek Olloyorov mamlakatdagi vaziyatni tahlil qilarkan, agentlikka moddiy yordam so‘rab oyiga 400 mingdan ortiq murojaat kelayotganini aytdi. Shuni inobatga olib, kambag‘al oilalar bilan individual ishlash tizimi joriy etilishi ustida ishlanmoqda.
“Ijtimoiy himoya yagona reyestrida ro‘yxatdan o‘tgan 1 milliondan ortiq oila davlat tomonidan moddiy yordam olmoqda. O‘zbekistonda kambag‘al bo‘lmagan oilalarning har uchtadan biri oliy maʼlumotga ega. Kambag‘al fuqarolarda esa bu ko‘rsatkich o‘ndan bir kishiga to‘g‘ri kelmoqda. Kambag‘al oilalar daromadining 30 foizdan ortig‘i sog‘liqni saqlash xizmatlariga sarflanadigan bo‘lsa, kambag‘al bo‘lmagan oilalarda bu ko‘rsatkich 9 foizdir. Oddiy oilalarning 14 foizida chorva bo‘lsa, kambag‘al oilalarda 2 foizni tashkil etadi”, deya maʼlum qildi agentlik masʼuli.
Mansurbek Olloyorovga ko‘ra, oxirgi uch yilda moliyaviy jihatdan og‘ir vaziyatda bo‘lgan uch million nafardan ortiq aholi sharoiti yaxshilangan. Natijada respublika bo‘yicha kambag‘allik darajasi 2021-yilda 17 foizdan 2023-yilgi 11 foizga tushirilgan. Kelgusi uch yilda bu ko‘rsatkichni 7 foizgacha pasaytirish maqsad qilingan.
Eslatib o‘tamiz, 27–29-avgust kunlari O‘zbekistonda ilk bor Ko‘p o‘lchovli kambag‘allik bo‘yicha hamkorlik xalqaro tarmog‘ining yig‘ilishi bo‘lib o‘tmoqda. Tadbirda 63 ta mamlakat va 30 dan ortiq xalqaro tashkilot vakillari, xususan siyosatchilar hamda iqtisodchilar ishtirok etyapti. Muloqotlarda kambag‘allikka qarshi birdamlikda, samaraliroq kurashish masalasi muhokama qilinmoqda.
Yig‘ilish ochilishida O‘zbekistonda BMT Taraqqiyot dasturi yordamida ko‘p o‘lchovli kambag‘allik indeksi joriy etilayotgani aytilgan. Hozirda mazkur yo‘nalishda Statistika agentligi 16 mingta uy-xo‘jaliklarida so‘rovnoma o‘tkazmoqda. Natijalar ilk marta 2025-yilda eʼlon qilinadi.
Izoh (0)