“Hozirda yetakchi xotin-qizlar milliy platformasini yaratish ustida ishlayapmiz” — Tanzila Norboyeva

Toshkentdagi Hyatt Regency Tashkent mehmonxonasida Fuqarolik jamiyati ayollar tashkilotlari ishtirokida “ ‘Markaziy Osiyoda tinchlik va xavfsizlikni ta’minlashda xotin-qizlarning rolini kuchaytirish to‘g‘risida’gi BMTning 1325-sonli rezolyutsiyasini amalga oshirish” mavzusida mintaqaviy forumi bo‘lib o‘tmoqda.

Unda O‘zbekiston Oliy Majlis Senati raisi, Markaziy Osiyo mamlakatlari yetakchi ayollari muloqoti raisi Tanzila Norboyeva, BMT bosh kotibining Markaziy Osiyo bo‘yicha maxsus vakili, BMTning Markaziy Osiyo uchun preventiv diplomatiya bo‘yicha mintaqaviy markazi rahbari Natalya German, “BMT-Ayollar” tuzilmasining Yevropa va Markaziy Osiyo bo‘yicha mintaqaviy ofisi direktori Aliya el-Yassir va bir qator xalqaro tashkilotlar rahbarlari, shuningdek, davlat va nodavlat tashkilotlari, xususan, Markaziy Osiyo mamlakatlaridan 30 dan ortiq fuqarolik jamiyatlarining ayol vakillari ishtirok etmoqda.

Forum ochilishida Tanzila Norboyeva nutq so‘zlab, forum mazmun-mohiyati, ko‘zlangan maqsad, tinchlik va xavfsizlikni ta’minlash, preventiv diplomatiyada ayollarning tutgan o‘rni, ishtiroki va roli, bu borada O‘zbekistonda amalga oshirilgan ishlarga alohida to‘xtalib o‘tdi.

“Bu galgi forum shunisi bilan ahamiyatliki, muloqot a’zolari, davlat tuzilmalari, mintaqadagi ayollar fuqarolik jamiyati tashkilotlari vakillari, BMT tuzilmalari rahbarlari va xalqaro ekspertlar birinchi marotaba ‘Xotin-qizlar, tinchlik va xavfsizlik’ global kun tartibini milliy va mintaqaviy darajada amalga oshirishda hamkorlik qilish masalalarini muhokama qilish uchun O‘zbekistonda to‘plandi.

Hozirgi vaqtda biz faoliyati davomida gender tenglikni targ‘ib qilish, barcha darajalarda (mahalla, tuman, viloyat, respublika) xotin-qizlar huquq va manfaatlarini himoya qilish masalalarini qamrab oladigan yetakchi xotin-qizlar milliy platformasini yaratish ustida ishlayapmiz.

Biz dolzarb masalalar, shu jumladan, xotin-qizlar huquqlarini himoya qilish bilan bog‘liq masalalarni hal etishda fuqarolik jamiyati institutlari muhim o‘rin tutishini bilamiz”, — dedi Tanzila Norboyeva.

Hozirda O‘zbekistonda 10 mingga yaqin nodavlat notijorat tashkilotlari faoliyat ko‘rsatmoqda. Ularning 300 dan ortig‘i gender masalalari bilan shug‘ullanadi.

Markaziy Osiyo mamlakatlari yetakchi ayollari muloqoti mintaqadagi xotin-qizlarni qo‘llab-quvvatlash, ularning siyosiy, iqtisodiy va ijtimoiy rolini oshirish hamda barqaror rivojlanish bilan bog‘liq qarorlarni qabul qilish jarayonlarida ishtirok etish imkoniyatlarini kengaytirish maqsadida norasmiy mintaqaviy platforma sifatida tashkil etilgan.

Markaziy Osiyo mamlakatlari yetakchi ayollari muloqoti qisqa vaqt ichida gender tengligi va barqaror rivojlanishni rag‘batlantirish, mintaqa ayollari o‘rtasidagi hamjihatlik va amaliy hamkorlikni mustahkamlash tarafdori bo‘lgan ayollarning muhim norasmiy koalitsiyasi ekanini isbotladi.

Muloqot boshlanganidan buyon qator uchrashuvlar o‘tkazilib, gender tenglikni ta’minlash, xotin-qizlarning huquq va imkoniyatlarini kengaytirishga oid ko‘plab dolzarb masalalar, bu boradagi mintaqaviy hamkorlik istiqbollari muhokama qilindi.