Sirdaryo viloyatida taqiqlangan ov qurollari bilan baliq ovlash holatlarining oldini olish maqsadida tezkor reyd tadbiri o‘tkazildi. Bu haqda Ekologiya vazirligi xabar berdi.
Maʼlum qilinishicha, reyd davomida Sirdaryo daryosidan chiqib kelayotgan “Moskvich” inspektorlar tomonidan ko‘zdan kechirilganda, avtotransport vositasi yukxonasidan 1 dona baliq ovlashga mo‘ljallangan elektr qarmoq, 1 dona rezina qayiq, 3 dona akkumulyator hamda umumiy hisobda 19 dona baliq borligi aniqlandi.
Ovlangan baliqlar orasida 2 dona oq amur, 7 dona oqqayroq, 9 dona tovonbaliq hamda Qizil kitobga kiritilgan 1 dona Turkiston mo‘ylovdori bo‘lgan. Ular noqonuniy ravishda elektr qarmog‘i yordamida Sirdaryo daryosidan ovlangani ma’lum bo‘ldi.
Holat yuzasidan hayvonot dunyosiga 495 mln so‘m zarar yetkazilgan.
Barcha hujjatlar huquqiy baho berish uchun tegishli huquqni muhofaza qiluvchi organlarga taqdim etiladi.
Noqonuniy baliq ovlash
Avvalroq Aydar-Arnasoy ko‘llarida 2024-yili noqonuniy ov oqibatida tabiatga 1,7 mlrd so‘mlik zarar yetkazilgani haqida xabar berilgandi. Shuningdek, Navoiyda noqonuniy baliq ovlagan shaxslar tabiatga 6,3 mlrd zarar yetkazgani haqida xabar berilgandi.
Bundan tashqari, Surxondaryo viloyati Sho‘rchi tumanida noqonuniy baliq ovlanishi natijasida tabiatga 1,4 milliard so‘m zarar yetkazilgan edi. O‘zbekiston hududida 2025-yil 1-sentyabrdan 2028-yil 1-yanvargacha ov qilishga moratoriy joriy qilinishi mumkinligi aytilgandi.
Izoh (0)