Bosh prokuratura “O‘zbekiston Respublikasi tabiiy suv havzalarida baliq ovlash qoidalarini tasdiqlash to‘g‘risida”gi Vazirlar Mahkamasi qarori loyihasini muhokamaga qo‘ydi.
Loyiha matnida qayd etilishicha, baliq ovlash bilan bog‘liq qonunchilik hujjatlaridagi mavjud bo‘shliqlar tabiiy suv havzalaridagi baliq resurslarini muhofaza qilinishi ustidan samarali nazorat o‘rnatish imkoniyatlari cheklanmoqda. Oqibatda so‘nggi yillarda baliq ovlash bilan bog‘liq huquqbuzarliklar soni ortgan. Taqiqlangan baliq ovlash quroli va ashyolarini yo‘q qilish borasida normalarning mavjud emasligi oqibatida takroriy huquqbuzarliklar sodir etish holatlari ko‘paymoqda.
Shuningdek, mamlakatda tabiiy suv havzalaridan sanoat miqyosida baliq ovlash uchun to‘lov miqdori, noqonuniy baliq ovlash oqibatida yetkazilgan zararlarni hisoblash tartiblari ham mavjud emas.
“Mamlakatimiz tabiiy suv havzalaridan baliq ovlash sohasidagi munosabatlarni tartibga solish, ulardagi baliq resurslarini muhofaza qilish va brakonyerlik holatlarining oldini olish uchun sohani huquqiy jihatdan tartibga solish zaruriyatini vujudga keltirmoqda”, — deyiladi hujjat matnida.
Shu munosabat bilan O‘zbekiston tabiiy suv havzalarida baliq ovlash qoidalari ilovaga muvofiq tasdiqlanib, ushbu qaror 2023-yil 1-iyuldan boshlab amalga kiritilishi kutilmoqda.
Baliqlarni tutish uchun to‘lovlar miqdoriga ko‘ra, noyob va yo‘q bo‘lib ketish xavfi ostidagi turlar, O‘zbekiston “Qizil kitobi”ga kiritilgan baliqlarni ilmiy, tibbiy maqsadlarda ovlash uchun BHMga 3 barobari miqdorida to‘lovni amalga oshirish lozim bo‘ladi. Xorijiy fuqarolar va yuridik shaxslar uchun esa mazkur to‘lov (1 donasi uchun) 500 dollarni tashkil etadi.
Qaror loyihasi bilan
- tabiiy suv havzalarida havaskorlik, sport va sanoat maqsadida baliq ovlash tartibi;
- baliqlarning sanoatbob o‘lchamlari, ularni ovlash uchun to‘lovlar miqdori, ovlash uchun ruxsat berilgan to‘rlarni maxsus tamg‘alash bo‘yicha talablar hamda sanoat maqsadida baliq ovlashning hisobini yuritish tartibi;
- baliq resurslaridan foydalanish ustidan nazorat, noqonuniy baliq ovlash oqibatida yetkazilgan zararlarni hisoblash tartibi;
- taqiqlangan baliq ovlash qurol va vositalarini yo‘q qilish masalalarini hal etishning tartibi belgilanmoqda.
Avvalroq Sirdaryo viloyati Sardoba tumanida o‘tkazilgan reyd tadbirida, “Sardoba” suv omborida noqonuniy ravishda baliq ovlagan ikki fuqaro aniqlangani, Jizzaxda ikki fuqaro noqonuniy baliq ovlab, tabiatga salkam 106 million so‘m zarar yetkazgani to‘g‘risida xabar berilgandi.
Izoh (0)