Toshkent viloyati Ekologiya boshqarmasi Sirdaryo suv havzasi sho‘basi inspektorlari tomonidan 29-aprel kuni Sirdaryo daryosining o‘ng qirg‘og‘ida nazorat tadbirlari o‘tkazildi. Bu haqda Ekologiya vazirligi matbuot xizmati xabar berdi.
Shunday tadbirlardan birida inspektorlar brakonyerlar hujumiga uchradi.
Maʼlum bo‘lishicha, reyd davomida Sirdaryo daryosining Oqqo‘rg‘on tumanidan oqib o‘tuvchi hududida inspektorlar nomaʼlum fuqarolar tomonidan taqiqlangan qurollar, yaʼni leskali to‘r, motorli qayiq yordamida baliq ovlanayotgani holatiga duch keladi. Sirdaryo suv havzasi sho‘basi boshlig‘i D.Zohidov va bosh davlat inspektori T.Bo‘riyev huquqbuzarlik holatiga chek qo‘yish maqsadida noqonuniy baliq ovlayotgan fuqarolarni yoniga qayiq bilan boradi. Ammo shu paytda huquqbuzarlar inspektorlarga hujum qilib, ularni suvga itarib yuboradi.
Shuningdek, brakonyerlar inspektorlarni suvga cho‘ktirish maqsadida rezina qayiqni yoradi. Bunday holatda qanday yo‘l tutishni bilgan inspektorlar esa daryoni qirg‘og‘iga suzib chiqadi. Buni ko‘rgan huquqbuzarlar inspektorlarni haqoratlab, ov qurollarini olib qochib ketadi.
Mazkur holat bo‘yicha huquqbuzarlarning shaxsiga aniqlik kiritish hamda holatga huquqiy baho berish maqsadida tegishli hujjatlar Toshkent viloyati prokuraturasi va viloyat IIBga yuborildi.
Bosh prokuratura matbuot xizmatining xabar berishicha, holat yuzasidan Toshkent viloyati prokuraturasi tomonidan tergov harakatlari olib borilmoqda. Tekshiruv natijalariga ko‘ra huquqiy baho berilishi maʼlum qilindi.
Izoh (0)