Filippin harbiy-dengiz kuchlari 20-iyun kuni 175 million dollar miqdoridagi giyohvand moddalarning noqonuniy partiyasini qo‘lga oldi. Bu haqda Arab News xabar berdi.
Bu mamlakatdagi eng yirik giyohvand moddalar kontrabandasi deb aytilmoqda. Bir juft harbiy-dengiz qayiqlari tongga yaqin Luson oroli qirg‘oqlarida 1,5 tonna metamfetamin gidroxlorid olib ketayotgan baliq ovlash kemasini tutib olgan. Filippin giyohvand moddalarga qarshi kurash agentligi bilan hamkorlikda o‘tkazilgan tezkor tadbirda 4 kishi, jumladan, bir nafar xorijlik qo‘lga olingan.
“Bizda haligacha giyohvand moddalar qayerdan kelgani haqida ma’lumotlar yo‘q. Bu Filippin harbiy-dengiz kuchlari tarixidagi eng yirik noqonuniy giyohvand moddalarni qo‘lga olishdir”, deyiladi politsiya bayonotida.
Yuklar kattaroq kemadan baliq ovlash kemasiga o‘tkazilgani haqida taxminlar borligi aytilgan. Mahalliy aholi orasida “shabu” nomi bilan tanilgan metamfetamin gidroxlorid Filippinda eng keng tarqalgan noqonuniy dori hisoblanadi. Iyun oyining boshida shu hududning shimolida katta miqdordagi giyohvand moddalar oqib ketgani aniqlangandi.
Filippin tarixidagi eng yirik giyohvand moddalar musodara qilinishi 2024-yilning aprel oyida sodir bo‘lgandi. O‘shanda poytaxt janubidagi Batangas provinsiyasidagi yo‘lda joylashgan politsiya nazorat punktida 2 tonnadan ortiq metamfetamin musodara qilingan edi.
Izoh (0)