Fransiyaning bir qator hududlariga yopirilgan kuchli yomg‘irli bo‘ron oqibatida kamida ikki kishi halok bo‘ldi, yana 17 nafar odam o‘rtacha og‘irlikdagi tan jarohati olgan. Bu haqda Franceinfo radiosi xabar bermoqda.
Ob-havo xavfining to‘q sariq darajasi 25-iyun, chorshanba kuni Fransiyaning Yevropa qismidagi 57 ta departamentda joriy etilgan. Mamlakatning shimolidan janubi-g‘arbigacha bo‘lgan keng hududda kuchli yog‘ingarchilik kuzatilgan, shuningdek, shamolning tezligi sekundiga 38 metrgacha yetgan.
Ma`lum qilinishicha, tabiiy ofat qurbonlaridan biri Tarn va Garonna departamentida yashovchi 12 yoshli o‘smir bo‘lgan. Uning va yonidagi bir nechta kattalarning ustiga daraxt shoxi qulab, bolani Averon daryosiga uloqtirgan. Shifokorlar uni qutqara olmagan, qolganlar esa Montaban kommunasi kasalxonasiga yotqizilgan.
Ikkinchi odam o‘tgan tunda Mayen departamentida halok bo‘lgan. 52 yoshli erkak haydayotgan mashina yo‘lga qulagan daraxtga borib urilgan.
Radiostansiyaning qutqaruv xizmatiga tayanib xabar berishicha, bir kishining ahvoli og‘ir, 16 nafar odam o‘rtacha og‘irlikdagi tan jarohati olgan. Jabrlanganlar orasidagi 82 yoshli erkakni chaqmoq urgan.
Yuz bergan bo‘ron oqibatida aksariyat departamentlar hududidagi uylar va infratuzilmaga moddiy zarar yetkazgan. Ko‘plab ko‘chalarni suv bosgan, poytaxt metrosining bir qator bekatlari ham suv toshqini tufayli yopilgan. Mamlakatning janubiy hududlarida yog‘ingarchilik yirik do‘l bilan kuzatilgan.
Ta`kidlanishicha, yog‘ingarchilik natijasida 100 mingdan ortiq xonadon elektr energiyasiz qolmoqda. Normandiyadagi Er departamentida momaqaldiroq cherkov qo‘ng‘iroqxonasini vayron qildi, qo‘ng‘iroq bino ichiga qulab, tomni teshgan.
"Fransiyaning Tornado va kuchli momaqaldiroqlar observatoriyasi ikki kun ichida osmonda bir necha yuzlab chaqmoq chaqqanini ma’lum qildi” - deya radiostansiya xabar berdi.
Bundan avval Xitoyning janubi-g‘arbiy qismidagi suv toshqini oqibatida 80 mingdan ortiq odam evakuatsiya qilingani xabar qilingandi.
Izoh (0)