Франциянинг бир қатор ҳудудларига ёпирилган кучли ёмғирли бўрон оқибатида камида икки киши ҳалок бўлди, яна 17 нафар одам ўртача оғирликдаги тан жароҳати олган. Бу ҳақда Franceинфо радиоси хабар бермоқда.
Об-ҳаво хавфининг тўқ сариқ даражаси 25 июнь, чоршанба куни Франциянинг Европа қисмидаги 57 та департаментда жорий этилган. Мамлакатнинг шимолидан жануби-ғарбигача бўлган кенг ҳудудда кучли ёғингарчилик кузатилган, шунингдек, шамолнинг тезлиги секундига 38 метргача етган.
Ма`лум қилинишича, табиий офат қурбонларидан бири Тарн ва Гаронна департаментида яшовчи 12 ёшли ўсмир бўлган. Унинг ва ёнидаги бир нечта катталарнинг устига дарахт шохи қулаб, болани Аверон дарёсига улоқтирган. Шифокорлар уни қутқара олмаган, қолганлар эса Монтабан коммунаси касалхонасига ётқизилган.
Иккинчи одам ўтган тунда Майен департаментида ҳалок бўлган. 52 ёшли эркак ҳайдаётган машина йўлга қулаган дарахтга бориб урилган.
Радиостанциянинг қутқарув хизматига таяниб хабар беришича, бир кишининг аҳволи оғир, 16 нафар одам ўртача оғирликдаги тан жароҳати олган. Жабрланганлар орасидаги 82 ёшли эркакни чақмоқ урган.
Юз берган бўрон оқибатида аксарият департаментлар ҳудудидаги уйлар ва инфратузилмага моддий зарар етказган. Кўплаб кўчаларни сув босган, пойтахт метросининг бир қатор бекатлари ҳам сув тошқини туфайли ёпилган. Мамлакатнинг жанубий ҳудудларида ёғингарчилик йирик дўл билан кузатилган.
Та`кидланишича, ёғингарчилик натижасида 100 мингдан ортиқ хонадон электр энергиясиз қолмоқда. Нормандиядаги Эр департаментида момақалдироқ черков қўнғироқхонасини вайрон қилди, қўнғироқ бино ичига қулаб, томни тешган.
"Франциянинг Торнадо ва кучли момақалдироқлар обсерваторияси икки кун ичида осмонда бир неча юзлаб чақмоқ чаққанини маълум қилди” - дея радиостанция хабар берди.
Бундан аввал Хитойнинг жануби-ғарбий қисмидаги сув тошқини оқибатида 80 мингдан ортиқ одам эвакуация қилингани хабар қилинганди.
Изоҳ (0)